Бишкек марказидаги норозилик акцияларида бир киши ҳалок бўлди, 590 киши жабрланди, деб хабар бермоқда «Gazeta.uz» Қирғизистон Соғлиқни сақлаш вазирлиги маълумотларига таяниб.
Фото: Kloop
Мамлакатнинг бир неча минг аҳолиси Қирғизистонда бир кун аввал бўлиб ўтган парламент сайловлари натижаларидан норози бўлгани учун митингга чиққан. Расмий маълумотларга кўра, 16 та иштирокчи партиядан 4 тасигина Жўқорғи Кенешга ўтган, улардан 2 таси — ҳукуматга қарашли. Сайловларда кўп сонли қоидабузарликлар, шу жумладан, овозларни сотиб олиш қайд этилган. Мағлуб бўлган партиялар вакиллари овоз бериш якунларини тан олишдан бош тортди ва Марказий сайлов қўмитасини уларни бекор қилишга чақирди.
Тинч бошланган акциялар кечга бориб, ҳуқуқ-тартибот органлари билан тўқнашувларга айланиб кетди. Куч вакиллари ёруғлик ва шовқин тарқатувчи гранаталар, кўзни ёшлантирувчи газ ва сув замбаракларини қўллади. Намойишчилар милиция билан тўқнашувларга тайёрланиб, кўчага ётқизилган плиталарни қўпориб, кўчаларни чиқинди идишлари билан тўсиб олди.
Намойишчилар парламент ва президент маъмурияти жойлашган Оқ уйни эгаллагач, Миллий хавфсизлик давлат қўмитаси биносига қараб йўл олди. Махсус хизмат ходимлари билан музокаралардан сўнг улар собиқ президент Алмазбек Атамбаевни ўтган йилдан буён ҳибсда сақланаётган МХДҚ тергов изоляторидан озод қилди. Колониядан, шунингдек, Атамбаев даврида ҳукуматни бошқарган собиқ бош вазир Сапар Исаков ҳам озод этилди.
«Gazeta.uz»нинг Бишкекдаги манбалари 5 октябрь куни интернет ва мобил алоқа ишида узилишлар кузатилгани ҳақида хабар берган. Кейинроқ уяли алоқа қайта тикланган.
Тартибсизлар бўлаётган бир пайтда Қирғизистон президенти Сўронбай Жээнбеков 6 октябрь куни парламент сайловларида қатнашган барча 16 та партия етакчилари билан учрашишини эълон қилди.
Давлат раҳбарининг матбуот котиби Тўлғаной Стамалиева маълум қилишича, президент айни пайтда Бишкекда ва у мамлакатдаги барча сиёсий кучларни мулоҳазакорликка чақиради. Унинг айтишича, юзага келган вазиятни ҳисобга олган ҳолда Сўронбай Жээнбеков Марказий сайлов қўмитасига қоидабузарликлар билан боғлиқ материалларни диққат билан ўрганиб чиқишни, керак бўлса, парламент сайловлари натижаларини бекор қилишни тавсия этмоқда.
«24.kg» агентлиги 6 октябрь куни эрталаб намойишчилар пойтахт мэрияси биносини эгаллаб олгани ҳақида хабар берди. Параллел равишда Ўшда Сўронбай Жээнбековни қўллаб-қувватловчи митинг бошланди.
Аввалроқ Бишкекда парламент сайлови натижаларидан норози бўлган минглаб одамлар намойишга чиққани ҳақида хабар берилган эди.
