Туркия Озарбайжонга Тоғли Қорабоғдаги можарода бевосита ҳарбий ёрдам кўрсатишга тайёрлигини билдирди. Meduza’нинг хабар беришича, бу ҳақда Туркия ташқи ишлар вазири Мавлут Чавушўғли маълум қилди.

Фото: Anadolu

Россия президенти матбуот котиби Дмитрий Песков Туркия ташқи ишлар вазирлиги ушбу баёнотига муносабат билдириб, «оловга ёғ қуймасликка» чақирди. «Биз барча мамлакатларни, айниқса, Туркия каби шерик давлатларни уришаётган томонларни ўт очишдан тўхтатиш ва бу узоқ йиллик можарони сиёсий ва дипломатик восита орқали тинч йўл билан ҳал қилишга қайтиш учун барча имкониятларни ишга солишга чақирамиз» , — деган у.

Эслатиб ўтамиз, Тоғли Қорабоғда Озарбайжон ва Арманистон ўртасида тўқнашувлар 27 сентябрдан бери давом этмоқда. Ҳар икки мамлакатда ҳам ҳарбий ҳолат эълон қилинди ва сафарбарлик бошланди. Иккала томон ҳам бир-бирларини тажовузда айбламоқда ва ўзларининг муваффақиятли жавоб ҳаракатлари ҳақида хабар бериб бормоқда.

Уруш бошлангандан сўнг дастлабки бир неча соат ичида Туркия Озарбайжонни қўллаб-қувватлашини билдирган, аммо олдинроқ тўғридан-тўғри ҳарбий ёрдам кўрсатиш тўғрисида расмий баёнот берилмаган эди.

Эрдўғон 27 сентябрь куни Озарбайжон президенти Илҳом Алиевга қўнғироқ қилиб, Туркия ҳар доимгидек бугун ҳам Озарбайжоннинг ёнида эканини айтган, шунингдек, «Озарбайжонга ҳужум қилган» Арманистонни қоралаб, уни босиб олинган ҳудудларни тарк этишга чақирган.

Арманистон 28 сентябрь куни Туркия Озарбайжонга жангларда қатнашиш учун минтақага ўз қўшинлари, техника ва мутахассисларини жалб қилганлиги ҳақида маълумот берган. Мамлакатнинг Россиядаги элчиси Вардан Тоғаняннинг сўзларига кўра, Туркия Суриядан ҳарбийларни минтақага юбормоқда. Арманистон бош вазири жаҳон ҳамжамиятидан Туркиянинг Қорабоғ ишига аралашувига йўл қўймасликни сўради.

Ўзбекистон Озарбайжон ва Арманистонни ҳарбий ҳаракатларни тезда тўхтатишга ҳамда можарони суверенитет ва ҳудудий яхлитлик тамойилларига риоя қилган ҳолда, тинч йўл билан бартараф этишга чақирган.