Арманистон билан можаро авж олиб бораётган бир пайтда Озарбайжон ҳукумати ижтимоий тармоқ ва мессенжерларни блоклаб қўйди. Бу ҳақда бутун дунё бўйлаб интернет мавжудлигини кузатувчи Netblocks ташкилотига таяниб, Meduza хабар қилди.
Netblocks маълумотларига кўра, Facebook, Twitter, Instagram, LinkedIn, TikTok ижтимоий тармоқлари, WhatsApp, Facebook Messenger, Skype ва Zoom мессенжерлари, YouTube видеохостинги блокланди.
Озарбайжон Транспорт, алоқа ва юқори технологиялар вазирлиги 27 сентябрь куни Арманистон томонидан кенг миқёсдаги провокацияларнинг олдини олиш мақсадида мамлакатда интернетни чеклаш тўғрисида огоҳлантирганди. Агентлик қайси хизматлар блокланиши ҳақида аниқ маълумот бермаган.
Россиянинг Интернетни ҳимоя қилиш жамияти нотижорат ташкилоти директори Михаил Климарев 28 сентябрь куни «Новая газета»га Озарбайжонда ижтимоий тармоқларга ВПН орқали кириш имконияти сақланиб қолаётганини, аммо мамлакатда бундай хизматлардан кам сонли одамлар фойдаланаётганини маълум қилди.
«Бундан ташқари, барча тармоқлар блокланмаган, масалан, «ВКонтакте» ўз ишини давом эттирмоқда», деб қўшимча қилди Климарев.
Эслатиб ўтамиз, 27 сентябрь куни тонгда Тоғли Қорабоғда Арманистон ва Озарбайжон ўртасида ҳарбий зиддият кескинлашди. Икки мамлакатда ҳам ҳарбий ҳолат эълон қилинди.
Аввалроқ Ўзбекистон ташқи ишлар вазирлиги вазият юзасидан ўз муносабатини билдириб ўтди. Туркия ва Афғонистон бу можарода Озарбайжонни қўллаб-қувватлашни билдирди. ШҲТ бош котиби Владимир Норов зиддиятни тинч йўл билан ҳал этишга умид қилди.
Арманистон Жаҳон ҳамжамиятидан Туркияни бу ишларга аралашишига йўл қўймасликни сўради. Расмий Ереван ўз навбатида Туркияни Суриядаги жангариларни Тоғли Қорабоғга йўналтиришда айбламоқда. Қайд этилишича, чегарага 4 мингдан ортиқ жангари йиғилган.
Изоҳ (0)