Финляндия орадан 10 кун ўтиб Швеция билан чегарада коронавирус чекловларини қайтармоқда. Эстония ва Норвегия ҳам «қизил рўйхат»га тушган

Финляндия ҳукумати қўшни Швеция, Норвегия ва Эстония давлатларини «қизил рўйхат»га қўшиб қўйди, деб ёзади «Фонтанка».

«Карантин сўнгги 14 кун ичида ҳар 100 минг киши орасида 25 дан ортиқ касалланиш ҳолати аниқланган барча давлатларга тааллуқли. 28 сентябрь куни Швеция ва Норвегия учун карантиннинг жорий этилиши бўйича тавсиялар амалга киради», — дейди мамлакат ИИВ канцелярияси бошлиғи Кирси Пимия.

Фин ҳукумати Суоми ва бошқа айрим давлатлар, хусусан, Швеция билан қатновларга қўйилган чекловни 19 сентябрь куни бекор қилганди. Бу борадаги қарор 11 сентябрда қабул қилинган.

Эстония финлар билан очиқ чегараларда «туристик пуфак» яратган илк мамлакатлардан бири ҳисобланади. Пимия кейинги ҳафтадан Таллинга амалга ошириладиган сафарлар ҳам карантин билан тугашини маслаҳат берган.

Аввалроқ Арманистонда коронавирус сабабли 2021 йилнинг 11 январигача карантин эълон қилингани, Киевда коронавирус билан касалланиш бўйича суткалик рекорд янгилангани сабаб шаҳарда карантин чекловлари қайтарилаётгани тўғрисида хабар берилганди. Шунингдек, Британия бош вазири Борис Жонсон мамлакатда қайта карантин жорий этилиши мумкинлигини маълум қилган.