Аксарият аёллар харид чоғида кўпроқ сифат, ранг, баҳо ҳамда айни дамда урфдами ёки йўқлигига аҳамият қаратади. Афсуски, бу бироз янглиш танлов. Масалан, харид қилинган либос маълум сабабларга кўра куз фаслида кийилмади, кейинги мавсумда эса либос урфдан қолганлиги сабабидан яна гардеробнинг бир четида тураверади. Шунинг учун ҳам харид чоғида ҳеч қачон урфдан қолмайдиган кийим танлашга ҳаракат қилиш керак.
Пальто
Пальто – анъанавий кузги иссиқ кийим. У турли услубда кийинувчилар учун бирдек керак. Пальтоларнинг оқ, кул ранг ёки қаймоқ рангдагиси ҳамиша урфда. Бундай палтоларни фақатгина бир мавсумда кийилади, деб ўйлаш нотўғри. Агар янада узоқроқ муддат кийишни хоҳлайдиганлар бўлса, пальтоларни узунроқ ва икки ўлчамда каттароғини харид қилиш керак. Чунки одатий ва спорт кийимлари билан ҳам мос тушиб кетаверади.
Тренч − Плаш
Плашлар одатда матоси ва тугмалардан бошқа безак берилмаслиги билан ажралиб туради. Куз мавсумида ҳар бир аёлнинг гардеробида бўлиши керак бўлган либослардан бири. Плашларнинг тўқ ва оч рангдагиси ҳам ҳамиш урфда бўлиб келган. Узунлиги тиззадан бироз тушиб турувчи, матосида бироз товланиши бор бўлган плашлар йиллар давомида трендда ҳисобланади.
Чарм кўйлак ёки шим
Гардеробда, албатта, куз учун аталган чарм кўйлак, шим ёки куртка бўлиши мумкин. Йиллар мобайнида урфда бўлиб келаётган чарм либосларани турли хил мато билан уйғунлаштириш мода оламида яхши янгилик бўлди. Масалан, бироз иссиқроқ ҳавода шифон, салқин кунларда уни трикотаж кийимлар билан бирга кийиш мумкин.
Иссиқ қалин свитер
Яна бир ажойиб танлов. Ҳар мавсумда янги свитер сотиб олиш камдан кам учрайдиган ҳолат. Свитер харид қилишда сифати ва матосига аҳамиятли бўлса, йиллар давомида уни юбка, чарм шим билан кийиш мумкин. Свитерда инсон ўзини эркин ва қулай сезади.
Классик костюм-шим
Расмий лавозимда ишлайдиган аёллар учун энг яхши либос классик услубдаги костюм-шим. Уни, албатта, гардеробдан жой олган сара кийимлар қаторига киритиш зарур. Шунингдек, уни биргаликда кийиш ҳам мумкин ёки бошқа бир либос билан мослаштириш ҳам осон. Шунингдек, ушбу либослар баланд пошнадан ташқари енгил пойабзал билан ҳам кийилмоқда.
Оверсайз услубидаги кўйлаклар
Ушбу услубдаги кўйлаклар ҳеч қачон инжиқлик қилмайди. Лекин кўйлак қомат учун бироз кенг ва катта туриши керак. Бундай либосларни харид чоғида қалинроқларини танлаш афзал, шунда мато тез ғижим бўлиб, муаммо туғдирмайди. Оверсайз услубидаги либосдан бир марта фойдаланган инсон, албатта, гардеробдан унинг учун алоҳида жой ажратади.
Қулай ҳамда енгил либослар
Бундай либослар пахта ёки жундан ҳам бўлиши мумкин. Агар кўпроқ спорт услубидаги либослар ёқса, унда женфер қисмига бириктирилган қалпоқлисини танлаган маъқул. Классик услуб тарафдорларига эса бунинг акси тавсия этилади. Шунингдек, бу либос палто, куртка билан ҳам мос келади.
Ясси баландликдаги оёқ кийим
Бу каби пойабзаллар ҳамиша трендда. Уни кўйлак ва шимлар билан кийиш мумкин. Жуда баланд бўлмаган бойлар учун ушбу оёқ кийимнинг ихчамроғини танлаш тавсия этилади. Ясси баландликдаги оёқ кийимлар ушбу куз мавсумида боғланадиган ёки қадаладиган бўлиши ҳам мумкин.
Ёрқин рангли пойабзал
Биринчидан чиройлилиги билан ҳам урфдан қолмайди. Ёрқин рангли пойабзаллар кузги либослар билан ажойиб уйғунликни акс этади. Агар хушбичим кўйлак билан ёрқин оёқ кийим танланса, у билан шаффоф рангли калготка кийиш тавсия этилади. Иссиқ, қулай ва ажойиб кўриниш.
Севимли либос
Ранг, сифат ва баҳонинг аҳамияти йўқ. Ҳар бир аёлнинг гардеробида бўлиши керак бўлган энг муҳим нарса – севимли либос. Бундай либос қийин вазиятларда ўз эгасига ёрдам қўлини чўзади ва муаммоларни бартараф этади.
Изоҳ (0)