Тошкент шаҳридаги умумтаълим муассасаларида таълим жараёнларини босқичма-босқич бошлаш мақсадида, 14 сентябрдан бошлаб 139 та мактаб ўз фаолиятини бошлагани тўғрисида хабар берилганди. Тошкент шаҳар ХТББ матбуот хизматининг хабар беришича, 15 сентябрдан бошлаб Шайхонтоҳур туманидаги 40, 262-сонли мактабларда анъанавий ўқув жараёни коронавирус инфекцияси бўйича эпидемик вазият барқарор бўлгунга қадар вақтинчалик тўхтатилди.
Қайд этилишича, 16 сентябрь ҳолатига Тошкент шаҳридаги 318 та умумтаълим муассасаларидан 137 таси анъанавий тарзда фаолият кўрсатмоқда.
Пойтахтдаги бошқа умумий ўрта таълим мактаблари санитар ва тиббий тайёргарлиги ҳолатидан келиб чиқиб, ўз фаолиятини анъанавий тарзда бошлагунга қадар онлайн тарзда, яъни «Онлайн-мактаб» лойиҳаси доирасидаги телевизион дарслар орқали дарс машғулотларини амалга оширади.
«Фурсатдан фойдаланиб, яна бир бор ота-оналардан мазкур жараёнга масъулият билан ёндошишларини, анъанавий шаклда фаолиятини бошлаётган мактаблар жамоасидан санитария қоидаларига қатъий риоя қилиш, фарзандларимиз ва яқинларимиз саломатлигини сақлашларини сўраб қоламиз», — дейилади хабарда.
Эслатиб ўтамиз, Ўзбекистонда 14 сентябрдан бошлаб яна очилиб, анъанавий таълим фаолияти йўлга қўйилган мактаблар сони 2635 тани ташкил этди. Аксарият мактабларда анъанавий таълим октябрь ойига қадар тикланиши кутилмоқда. Бунда мактабларни очиш ҳақидаги қарор индивидуал тарзда жойлардаги ҳақиқий ҳолат ҳамда соғлиқни сақлаш тизими хулосаларига мувофиқ, маҳаллий кенгашлар депутатлари рухсатидан сўнг қабул қилинади.
Изоҳ (0)