13 сентябрь куни Бухоро вилоят ҳокимлиги биносида вилоят халқ таълими бошқармаси бошлиғи Дилфуза Мустафоева иштирокида брифинг бўлиб ўтди. Брифингда вилоятдаги қатор мактаб ўқитувчилари ва техник ходимлардан коронавирусга олинган тест натижалари эълон қилинди.

Фото: «Дарё»

Таъкидланишича, Бухоро вилояти Халқ таълими бошқармаси тизимида 536 та мактаб фаолият юритади. Дилфуза Мустафоевага кўра, 2020/2021-ўқув йилида вилоят педагог кадрлари 28 053 нафарни ташкил этади. Мактабларда анъанавий таълим бошланишидан олдин вилоятда барча ўқитувчи ва мактаб ходимлари коронавирусга тест топширишган. Ҳозирга қадар 18 831 нафар ўқитувчи ва техник ходимдан тест олиниб, уларнинг 239 нафарида коронавирус аниқланган:

  • Бухоро шаҳрида 3259 нафар ўқитувчидан 46 нафарида;
  • Когон шаҳрида 666 нафар ўқитувчидан 11 нафарида;
  • Олот туманида 1237 нафар ходимдан 23 нафарида;
  • Бухоро туманида 1843 нафар ходимдан 22 нафарида;
  • Вобкент туманида 1903 нафардан 33 нафарида;
  • Қоракўл туманида 1575 нафардан 20 нафарида;
  • Пешку туманида 855 нафардан 29 нафарида;
  • Ромитан туманида 1860 нафардан 15 нафарида;
  • Когон туманидаги 955 нафардан 9 нафарида;
  • Ғиждувон туманида 2608 нафардан 10 нафарида;
  • Қоровулбозор тумани 385 нафардан 7 нафарида;
  • Жондор туманида 857 нафардан 8 нафарида;
  • Шофиркон туманида 828 нафардан 5 нафарида COVID-19 коронавирус инфекциясига топширилган тест натижаси «мусбат» деб топилган.

Дилфуза Мустафоева 239 нафар мактаб ўқитувчиси ва техник ходимида коронавирус аниқланганини айтган бўлса-да, 238 киши ҳақида маълумот берган.

Аввал Ўзбекистонда пандемия шароитида ўқитувчи ва ўқувчиларнинг соғлиғини ҳимоя қилиш мақсадида мактаб ўқитувчиларидан оммавий равишда COVID-19’га тест олинаётгани хабар қилинган. Шунингдек, Самарқанд вилоятининг Жомбой туманида 40 нафар ўқитувчида, Пайариқ туманида эса 60 нафар ўқитувчида коронавирус аниқлангани маълум бўлганди.