Евросиё иқтисодий кенгаши комиссияси 4 сентябрь куни бўлиб ўтган йиғилишда Олий Евросиё иқтисодий кенгашининг Ўзбекистонга ЕИИ кузатувчи давлати мақомини бериш ҳақидаги қарори лойиҳасини кўриб чиқди. Якуний қарор Иттифоқ давлатларининг раҳбарлари томонидан қабул қилинади. Бу ҳақда комиссия томонидан маълум қилинди.
Хабар берилишича, аввалроқ Ўзбекистон президенти айни пайтда Олий Евросиё иқтисодий кенгаши раиси бўлиб турган Беларусь президенти Александр Лукашенкодан Ўзбекистонга кузатувчи давлат мақомини бериш масаласини кўриб чиқишни сўраган.
Қайд этилишича, сўнгги йилларда Ўзбекистон Евросиё иқтисодий иттифоқи давлатлари билан икки томонлама ҳамкорликни ривожлантирмоқда. 2016—2019 йилларда Ўзбекистоннинг иттифоқ давлатлари билан савдо айланмаси 60 фоизга ошиб, 8,4 миллиард долларга етган. Ҳозирги пайтда Ўзбекистоннинг ЕИИ давлатлари билан ташқи савдо улуши 30 фоизни, қишлоқ хўжалиги маҳсулотлари экспорти эса 75 фоизни ташкил қилади.
ЕИИ тўғрисидаги шартноманинг 109-моддасига мувофиқ, кузатувчи давлат вакиллари таклифга асосан Иттифоқ органларининг йиғилишларида қарор қабул қилишда иштирок этиш ҳуқуқисиз қатнашиши ва қабул қилинаётган махфий характерга эга бўлмаган ҳужжатларни олиши мумкин.
Эслатиб ўтамиз, Ўзбекистоннинг Евросиё иқтисодий иттифоқига кузатувчи давлат сифатида қўшилиши ҳақидаги қарор 2020 йилнинг 28 апрель куни Олий Мажлис Қонунчилик палатаси томонидан, 11 май куни Сенат томонидан маъқулланганди.
Изоҳ (0)