Ўзбекистон Россия билан халқаро авиақатновларни сентябрь ойи давомида тиклаши мумкин. Бу ҳақда Ўзбекистон соғлиқни сақлаш вазирининг биринчи ўринбосари, Санитария-эпидемиологик осойишталик агентлиги директори Баҳодир Юсупалиев «Коммерсантъ»га берган интервьюсида маълум қилган.
«Республика махсус комиссияси қарорига кўра эпидемиологлар фикрини инобатга олиб авиақатновларни қайта тиклаш ва фуқароларнинг мамлакатга кириши ёки ундан чиқиши юзасидан тартиб ишлаб чиқилмоқда.
Мамлакат ҳудудига кириш-чиқиш масалаларига келсак, дастлаб қатъий карантин чекловлари ўрнатилиб, хориж давлатларининг фуқаролари карантин ҳудудларига юборилди. Айни вақтда мазкур чоралар юмшатилган, карантинни меҳмонхона ёки уйда ўтказиш мумкин. Биз хориждан келганларни 14 кун давомида назорат қиламиз ва касаллик аломатлари кузатилмаса, улар республика ҳудудида эркин ҳаракатланиши мумкин.
Шунингдек, ишлаб чиқилган тартиб асосида хорижда ПЗР-текшируви орқали кам касалланиш ҳолатлари кузатилаётганини аниқлаб, маълумотлар ҳаққонийлигини текширамиз. Шунга кўра таҳлиллар асосида авиақатновларни қайта бошлаш бўйича қарор чиқарилади. Бу тобора тезлашаётган жараён ва, менимча, буёғига чегаралар очилишда давом этади.
Сентябрда Россия билан авиақатновлар қайта тикланиши мумкин. Лекин 15 мартдан қатъий карантин тартибини сақлаб, кейин чекловларни юмшатиб, янги касалланиш тўлқинига дучор бўлганимизни тўғри тушуниш керак, якунда карантин 15 августгача чўзилди ва 5 сентябрдан чекловлар яна юмшатилди. Барча мамлакатлардаги каби мактабларни, мактабгача таълим муассасаларини очяпмиз. Республикадаги вазиятга баҳо бериш учун вақт талаб қилинади. Касалланишлар сони камайса, авиақатновлар қайта тикланиши мумкин», — деган Баҳодир Юсупалиев.
Аввалроқ Uzbekistan Airways АЖ халқаро йўналишлар бўйича мунтазам парвозларни қайта тиклашини маълум қилганди.
Шунингдек, Баҳодир Юсупалиев Россия нашрига берган интервьюсида Ўзбекистон коронавирусга қарши Россия вакциналарини сотиб олиш имкониятлари кўриб чиқилаётганини ҳам айтиб ўтган.
Изоҳ (0)