Грузия ҳукумати мамлакатга келувчиларни карантинга олиш муддатини 12 кундан 8 кунгача қисқартирди, шунингдек, улар 15 сентябрдан бошлаб COVID-19 коронавирус инфекцияси бор ёки йўқлигини аниқлаш мақасдида топширилган ва 72 соат давомида амал қилувчи ПЗР-тест натижаси ҳақида маълумотнома тақдим этишлари лозим. Бу ҳақда мамлакат бош вазири Георгий Гахария махсус брифингда маълум қилган, деб ёзмоқда «РИА Новости».
Мазкур қарор коронавирусга қарши кураш бўйича мувофиқлаштирувчи кенгаш йиғилишида қабул қилинган. Грузия тўғридан-тўғри авиақатновларни тиклаган Германия, Франция, Латвия, Литва ва Эстония давлатларининг фуқароларидан ташқари мамлакатга хориждан қайтган шахсларнинг ҳаммаси мажбурий тартибда карантинда бўлиши белгилаб қўйилган. Асосан касалланганлар билан мулоқотда бўлганлар ўзини яккалаш тартибига ўтказилади. 15 сентябрдан бошлаб юқорида қайд этилган Европа давлатларининг фуқаролари Грузияга келган вақтида чегарада топширилган ПЗР-тест ҳақидаги маълумотномани тақдим этишлари лозим.
«Мажбурий карантин муддати саккиз кунни ташкил қилади. Биз ушбу муддатни фуқаролар ва мамлакатга келган меҳмонлар учун ноқулайликларни камайтириш мақсадида қисқартиряпмиз. Карантиннинг тўққизинчи кунида фуқаро ПЗР-тест топширади ва натижа манфий чиқса, у ҳудудни тарк этиши мумкин. Ўн иккинчи карантин куни яна бир марта тест топшириш талаб этилади», — деган грузия бош вазири.
Шунингдек, ҳукумат раҳбари коронавирус билан касалланишга алоқадор ҳолатлар кўпайгани туфайли Ажария соҳилларидаги Қора денгиз курорт ҳудудида Батуми ва Кобулетидаги мактаблар ва университетларда ўқув жараёни 1 октябргача бошланмаслигини билдирган.
Изоҳ (0)