Александр Лукашенко Беларусь президентлик курсисида «бироз кўп ўтириб юборган бўлиши мумкинлиги»ни тан олди. Meduza’нинг хабар беришича, бу ҳақда Бутунроссия давлат телерадиоэшиттириш компанияси мухбири Евгений Рожков Лукашенконинг Россия ОАВларига берган интервьюсидан кейин «Россия 1» эфирида айтди.
Рожковнинг сўзларига кўра, Лукшенко билан интервьюда Беларусдаги норозиликлар сабабини сўраган. Президент асосий сабаб сифатида ташқи таъсир, хусусан, америкаликлар томонидан таъсирни кўрсатган. Лекин шу билан бирга беларусликлар норозилигига сабаблар ҳам борлигини тан олган.
«Мен наҳотки норозиликларга фақат ташқи таъсирлар сабаб бўлган деб сўрадим. У ички сабаблар ҳам борлигини айтди ва қуйидагиларни таъкидлади: «Ҳа, эҳтимол, мен кўп ўтирворгандирман. Мени фақат телевизордан эмас, дазмол ва чойнакдан ҳам кўринаётгандирман. Лекин ҳақиқатан ҳам айни пайтда Беларусни фақат мен ҳимоя қила оламан», — деб Лукашенко билан бўлиб ўтган суҳбатни баён этган Рожков.
Журналистнинг қўшимча қилишича, Лукашенко норозилик намойишларининг иккинчи ички сабаби сифатида Беларусда икки янги авлод улғайгани ва «кичик буржуа синфи шакллангани»ни кўрсатган. «У айтганидек, буржуачилар. Ва бу ҳақиқатан ҳам норозиликка олиб келган. Улар ҳокимликка интилмоқчи», — дея Лукашенконинг фикрларини келтирган Рожков.
Александр Лукашенко Россия ОАВларига 8 сентябрь куни Минскда интервью берган. Евгений Рожковдан ташқари у билан бошқа нашр ва радиодан бўлган журналистлар ҳам иштирок этган.
Эслатиб ўтамиз, 9 август куни Беларусда президентлик сайловлари ўтказилди. Марказий сайлов комиссия маълумотларига кўра, у 80 фоиз овоз олиб олтинчи марта ғолиб бўлди. Шу билан бирга ОАВлар ва кузатувчилар сайловларда кўплаб қоидабузарликларга йўл қўйилганини билдирган. Сайловлардан сўнг оммавий норозиликлар бошланган ва ҳали ҳам давом этиб келмоқда.
Изоҳ (0)