Тошкент вилояти Тошкент туманида аҳоли талаби юқори бўлган доир воситаларини ноқонуний йўл билан муомалага киритмоқчи бўлган шахс қўлга олинди. Бу ҳақда Бош прокуратура «Дарё»га хабар қилди.
Маълум қилинишича, Бош прокуратура ҳузуридаги департаментнинг Тошкент туман бўлими томонидан тезкор тадбир ўтказилган.
Тадбир давомида фуқаро А.С. пандемия шароитида аҳоли талаби юқори бўлган дори воситаларини ноқонуний муомалага киритиб даромад орттириб қолиш мақсадида 500 дона «Клексан», 300 дона «Гепарин», 200 дона «Цефоперазон-суль», 500 дона «Меропенем», 500 дона «Арбидол 50 мг» ва «Арбидол 100 мг» дори воситаларини жами 171 миллион сўмга сохта шартнома орқали харидорга сотган вақтида ашёвий далил билан ушланган.
Мазкур ҳолат юзасидан А.С.га нисбатан Жиноят кодексининг 186-3-моддаси 2-қисми «а» банди (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Изоҳ (0)