Самарқандда гиёҳвандлик моддалари билан боғлиқ жиноятни ижобий томонга ҳал қилиш эвазига ИИО ходимига пора берган аёл жиноят устида қўлга олинди. Бу ҳақда «Ўзбекистон 24» телеканалида маълум қилинди.
Маълум бўлишича, 26 август куни Самарқанд тумани Жиноят-қидирув бўлими томонидан туман ҳудудида яшовчи фуқаролардан бирининг уйи кўздан кечирилади. Уйдан бир дона рангсиз целлофан бўлакчасида қадоқланган, оғирлиги 0,22 граммга тенг гашиш аниқланиб, холислар иштирокида расмийлаштириб олинади. Тадбир вақтида фуқаро яшаш уйидан қочиб кетган.
Шу куни кечаси соат 19:00 ларда ИИБ ходимининг олдига ўзини гумонланувчининг онаси деб таништирган аёл келиб, ўғлининг хонадонидан гиёҳвандлик моддаси топилгани, бу ишни пул эвазига ижобий ҳал қилиб беришни сўраган. Бунинг эвазига аёл 3 минг АҚШ доллар таклиф қилган.
ИИБ ходими фуқаронинг бу ҳаракати ноқонунийлиги, пора бериш, олиш, воситачилик қилиш жиноят эканлигини тушунтиришига қарамасдан, аёл 3 минг доллари миқдоридаги пулни соат 10:00 да олиб келишини айтиб, чиқиб кетган.
ИИБ ходими вилояти Ички ишлар бошқармасига билдирги билан мурожаат қилиб, юқоридаги ҳолатни баён қилган. Мазкур билдиргига асосан 27 август куни ИИВ Ўз хавфсизлиги бошқармаси Самарқанд вилояти бўйича бўлими ходимлари ҳамкорлигида ўтказилган тезкор тадбир давомида аёл 4 минг долларни пора тариқасида бераётганида ашёвий далиллар билан ушланган.
Ҳолат юзасидан Самарқанд туман прокуратураси томонидан Жиноят кодексининг тегишли моддалари билан жиноят иши қўзғатилган.
Аввалроқ Самарқандда ЙПХ ходимига 1,5 миллион сўм пора берган ҳайдовчи ушлангани тўғрисида хабар берилганди.
Изоҳ (0)