Ижтимоий тармоқларда Ўзбекистон Конституциявий суди раиси Бахтиёр Мирбобоевнинг ўз лавозимини қонунни бузган ҳолда эгаллаб турганлиги ҳақида хабарлар тарқалганди ва Олий Мажлис Қонунчилик палатасининг Коррупцияга қарши курашиш ва суд-ҳуқуқ масалалари қўмитаси раиси ўринбосари Шуҳрат Полвонов бу масала бўйича ўз изоҳини берганди. Конституциявий суд котибияти мазкур хабарларга муносабат билдирди.
Маълум қилинишича, ҳозирги кунда Конституциявий суднинг ташкил этилиши ва фаолияти 2017 йил 31 майда қабул қилинган «Ўзбекистон Республикасининг Конституциявий суди тўғрисида»ги конституциявий қонунга мувофиқ тартибга солинади. Қонунга мувофиқ, Конституциявий суд унга кўриб чиқиш учун қонунда белгиланган субъектлар томонидан киритилган масалалар юзасидан қарорлар қабул қилиб келмоқда. Қабул қилинган қарорлар ҳақида Конституциявий суднинг расмий веб-сайтидан маълумот олиш мумкин.
Қайд этилишича, Конституциявий суд томонидан кўриладиган ишларнинг кўплиги ёки камлиги унга масала киритиш ҳуқуқига эга бўлган субъектларга боғлиқ.
«Кейинги тўрт йил ичида янги Ўзбекистон ижтимоий ҳаётини демократлаштиришга қаратилган кенг қамровли ислоҳотлар Конституциявий судда кўриб чиқиш учун масала киритувчи субъектлар доирасини ҳам кенгайтириб, улар қаторига фуқаролар ва юридик шахсларни ҳам қўшишни тақозо этмоқда. Ҳозирги кунда шундай ўзгаришларни қонунчиликка киритиш масаласи юзасидан қонун лойиҳаси тайёрланиб, Ўзбекистон Республикаси Норматив-ҳуқуқий ҳужжатлар лойиҳалари муҳокамаси портали орқали кенг жамоатчилик фикри олинди ва лойиҳа такомилига етказилди. Ўйлаймизки, келгусида Конституциявий судга кўриб чиқиш учун фуқаролар томонидан масала киритилиши Конституциявий суд томонидан кўриб чиқиладиган ишларнинг сонини кескин оширади», — дейилади Конституциявий суд хабарида.
Таъкидланишича, конституциявий қонуннинг 6-моддасига мувофиқ, айни бир шахс икки мартадан ортиқ Конституциявий суднинг судьяси этиб сайланиши мумкин эмас. Бу қоида 2017 йил 1 июндан бошлаб сайланган судьяларга нисбатан татбиқ қилинади. Қонунга мувофиқ, судьянинг ваколат муддати беш йилни ташкил этади.
Конституциявий қонун қабул қилингунгача амал қилган қонунда Конституциявий суд судьясининг ваколатлари муддатига нисбатан чеклов белгиланмаган. Қонунда Конституциявий суднинг судьяси лавозимида бўлишнинг энг юқори ёши, қоида тариқасида, 70 ёшни ташкил этади деб белгиланган. Қонунчилик техникасига мувофиқ «қоида тариқасида» деган тушунча умумий талаб бўлиб, айрим пайтда истисноли ҳолатлар бўлиши мумкинлигини англатади.
Қонунга кўра, Конституциявий суд таркибини шакллантиришда учта субъект иштирок этади. Конституциявий суд судьяси Ўзбекистон Президентининг тақдимига биноан Олий Мажлис Сенати томонидан Судьялар олий кенгаши тавсия этган шахслар орасидан сайланади. Судьяларни сайлашда номзоднинг маънавий фазилатлари, ҳаётий тажрибаси, билими ва салоҳияти эътиборга олинади.
«Конституциявий суд раиси ва унинг ўринбосари Конституциявий суд мажлиси судьялари орасидан сайланади. Яъни, ким судья, суд раиси ёки раис ўринбосари бўлиб сайланиши бир ёки икки кишининг хоҳиш-истагига боғлиқ эмас», — дейилади баёнотда.
Таъкидланишича, Конституциявий суд тўғрисидаги қонуннинг асосий қоидалари Германия, Франция, Россия каби ривожланган демократик мамлакатларнинг конституциявий судлов тўғрисидаги қонунларига мос келади.
«Хулоса қилиб айтганда, Ўзбекистон Республикаси Конституциявий судини ташкил этишда ва унинг фаолиятида қонун бузилиши ҳолатлари мавжуд эмас», — дейилади суд котибияти хабарида.
Изоҳ (0)