Навоийда 2-синф ўқувчисини уриб юбориб, унга оғир тан жароҳати етказган Tico ҳайдовчисига жиноят иши қўзғатилди. Бу ҳақда «Дарё»га Навоий вилоят ИИБ ЙҲХБ матбуот гуруҳи катта инспектори Фарруҳ Якубов хабар берди.
Таъкидланишича, 2020 йилнинг 3 сентябрь куни соат 15:30 да Нурота тумани Жарма қишлоғида яшовчи А.Х. ўз бошқарувида бўлган Тикўни қишлоқнинг ички йўлидан бошқариб кетаётиб, эҳтиётсизлик оқибатида йўлни кесиб ўтаётган 8 ёшли болани уриб юборган.
Тумандаги 51-умумий ўрта таълим мактабининг 2-синф ўқувчиси Ш.М. ЙТҲ натижасида бош мия ёпиқ жароҳати, пастки жағ ёпиқ синиб силжиши каби оғир тан жароҳатини олиб, шифохонага ётқизилган.
Мазкур ҳолат юзасидан ҳайдовчига нисбатан Жиноят кодексининг 266-моддаси 1-қисми (транспорт воситасини бошқарувчи шахс томонидан транспорт воситалари ҳаракати ёки улардан фойдаланиш хавфсизлиги қоидаларини бузиш баданга ўртача оғир ёки оғир шикаст этказилишига сабаб бўлиши) билан жиноят иши қўзғатилган. Тергов-суриштирув жараёнлари давом этмоқда.
Эслатиб ўтамиз, аввалроқ Навоий вилояти Конимех туманида йўлда ухлаб қолган Nexia ҳайдовчисининг ЙТҲ содир этиши оқибатида 10 ёшли бола қурбон бўлгани, Тошкентда эса бировнинг Lacetti’сида она ва болани уриб юборган 18 ёшли фуқаронинг айби билан она ва унинг 2 ёшли фарзанди вафот этгани хабар берилганди.
Изоҳ (0)