Volkswagen компанияси бешинчи авлод Caddy базасида автоуй яратди — янги версия California номини олган бўлиб, у эски Caddy Beach ўрнини эгаллайди. Ихчам кэмпер салкам икки метрли каравот ва мини-ошхона билан жиҳозланган. Шунингдек, жамланмадан модулли палаткалар тизими ҳам ўрин олган, деб хабар беради Motor.
Volkswagen Caddy California бир нечта вариантда тақдим этилади: узунлиги 4501 ва 4853 миллиметрли, қуввати 75 ёки 122 от кучига тенг дизель моторли, олд ёки тўлиқ узатмали. Модификациясидан келиб чиқиб, автоуй 1980х1070 ўлчамли икки ўриндиқли каравот билан жиҳозланган бўлиб, юкхона бўлмаси устида, бевосита панорама том остида жойлашган.
Ошхона бир нечта кўчма элементлардан иборат: юқори қисмида шамолдан ҳимоя қилувчи экранга эга газ плитаси, унинг остида эса ошхона анжомларини сақлашга мўлжалланган жавон жойлашган. Caddy California’нинг қуйруқ қисмида модулли палатка тизими ўзига хос усулда қотирилади. Унинг остида беш киши ўтириши мумкин.
Автоуй жиҳозлари орасидан рақамли қурилмалар панели, 10 дюймли экранга эга мултимедиа тизими, шунингдек, ҳайдовчига ёрдам берадиган 19 та тизим, жумладан, Travel Assist круиз-назорати ҳам ўрин олган. Caddy California’нинг қисқа варианти Европада 2020 йил охирларида, узун варианти эса 2021 йилда сотувга чиқади.
Эслатиб ўтамиз, Тошкентда 27 июль куни Volkswagen Caddy автомобиллари тақдимоти бўлиб ўтган эди. Мамлакат бозори учун автомобиль уч хил кўриниш ва комплектацияда тақдим этилмоқда.
Изоҳ (0)