Инсон ёши ўтган сайин нафақат тез-тез хасталаниб қолади, балки касалликка дош бериши ҳам қийинлашиб боради. Унчалик ҳам жиддий кўринмаган касалликлар аслида ёши катта инсонлар учун хавфли бўлиши мумкин. Улар қайсилар эканини билиб қўйган яхши.
Грипп
Шифокорлар, айниқса, ёши катта инсонларни гриппдан қаттиқ огоҳлантиради. Чунки 60 ёшдан ўтганлар гриппга қарши курашишда энг заиф гуруҳга айланади. Сабаби айнан гриппдан сўнг юрак хасталигидан тортиб пневмонияга қадар хавфли асоратлар қолади. Қариялар ҳар йили гриппга қарши эмланса-да, бу касалликнинг олдини олишга ёрдам бермайди. Шунчаки касалликнинг асорати хавфсизроқ ўтади.
Грипп нимаси билан ёши катталар учун хавфли ҳисобланади?
Биринчи навбатда, пневмония хавфи юқори бўлади. Кўпинча ўпка билан боғлиқ муаммолар гриппнинг асосий белгилари йўқолганидан икки-уч ҳафта ўтиб, йўтал қолдиқлари орқали намоён бўлади. Бундай пайтда муаммо жиддий тус олиши мумкин, шунинг учун дарҳол шифокор кўригидан ўтиш зарур. Агар нафас қисилиши, бош айланиши, кўкрак қафасидаги сиқилиш, қайт қилиш ва тана ҳарорати кўтарилиши кузатилса, албатта, тиббий ёрдамга мурожаат қилиш зарур.
Жиғилдон қайнаши
Барчада ҳам вақти-вақти билан жиғилдон қайнаши кузатилади, лекин у мунтазам равишда пайдо бўлса ёки бир-икки ҳафта ва ундан ҳам кўпроқ муддат давомида ўтиб кетмаса, сурункали жиғилдон қайнаши ёки унинг хавфли шакли – ошқозон-ичак касаллигига олиб келиши мумкин. Айнан бу ҳолат кексалар организмида қизилўнгач қопламаси тўқималарига зарар етказади. Зарарланган тўқима эса ҳар хил бактерия ва юқумли касалликлар учун очиқ эшик вазифасини бажаради ва заифлашган иммунитетни осонгина енгади.
Кайфият ўзгариши
Ёши катта инсонларда мунтазам равишда кайфиятнинг ўзгариши, шунингдек, сабабсиз пайдо бўладиган тушкунлик ҳиссиётлари сезила бошланса, албатта, шифокорга мурожаат қилиш зарур. Бу қалқонсимон без касаллигининг дастлабки белгилари бўлиб, витамин етишмаслигининг намоён бўлишидир. Шунингдек, кекса одамларда ногиронлик ҳолатининг 6 фоизи тушкунликка тушиш билан узвий боғлиқ. Агар ушбу огоҳлантирувчи белгилар олдиндан сезила бошласа, шифокор кўригидан ўтиш ва беморга аввалгидан кўпроқ эътибор қаратиш, ижтимоий ҳаётга олиб кириш, уларни иложи борича, ёлғиз қолдирмасдан мулоқот қилиш тавсия этилади.
Суяк мўртлашуви
Менопауза даврида аёллар кальций моддасини фаол равишда йўқотишни бошлайди ва бу жараён ҳар ўн йилликда тезлашади. Ёш улғайган сари суяклар ва бўғимлар мўртлашиб, синиш хавфи ҳам ошиб боради. Уларни даволаш ва тиклаш эса жуда кўп вақт талаб этади. Бунинг учун йиқилишга сабаб бўладиган барча хавфли омилларни йўқ қилиш муҳим ҳисобланади. Бунда, энг аввало, қулай пойабзал танлаш тавсия этилади, кўзнинг кўриш даражаси сусайган бўлса, офталмолог назоратидан ўтиш керак. Шунингдек, бош айланиши кузатилса, уй ёки хонадон иложи борича паст ва хавфсиз ҳолатда бўлишини таъминлаш зарур.
Изоҳ (0)