Coca-Cola Суперлигаси 13-туридан ўрин олган «Андижон» — «Пахтакор» ўйини Андижон клубидаги молиявий муаммолар сабаб бекор қилингани ҳақида хабар берилганди.
Профессионал футбол лигаси хабаридан ҳеч қанча вақт ўтмай, «Championat.asia» нашри клуб молиявий муаммоларга ечим топгани ҳақида хабар берди. Нашр ўйин ўз вақтида (19:00) бўлиб ўтишини таъкидлади.
ПФЛ бу борада расмий баёнот берди.
Кеча, 26 август куни соат 13:53 да «Андижон» футбол клуби ўзининг U-21 жамоаси «Пахтакор»га қарши учрашувга молиявий қийинчиликлар сабаб этиб кела олмаслигини маълум қилди. ЎзПФЛ мазкур хатга асосан ўринбосарлар учрашувини бекор қилиб, «Андижон» U-21 жамоасига техник мағлубият ёзди.«Андижон» футбол клуби виц-президенти Маъруф Абдусаломов (ПФЛ хабарига кўра, клуб уставида бундай лавозим мавжуд эмас) номидан ПФЛга 27 август куни 1 соат-у 20 дақиқа оралиқ билан юборилган иккита хатни қуйида кўришингиз мумкин:Бугун, 27 август куни соат 10:47 да «Андижон» футбол клуби ўзининг асосий таркиби ҳам «Пахтакор» билан учрашувга юқоридаги сабаб туфайли кела олмаслигини маълум қилди. Расмда келтирилган хат асосида ЎзПФЛ учрашувни бекор қилди. Бу хабар «Пахтакор» футбол клубига, учрашув хавфсизлиги учун жавобгар бўлган Ички ишлар органларига, «Локомотив» стадиони маъмуриятига, учрашув трансляцияси учун жавобгар бўлган «Спорт» телеканалига маълумот учун тақдим этилди.
«Андижон» клубининг биринчи хатидан 1 соат-у 20 дақиқа ўтиб, клуб учрашувда иштирок этмоқчи экани борасида хат йўллади. Ҳар икки хат вице-президент Маъруф Абдусаломов томонидан имзоланган.
ЎзПФЛ ҳар қандай ҳолатда ҳам футбол учрашувларини ўтказиш учун ҳаракат қилади. Шундан келиб чиқиб, бекор қилинган барча тадбирлар қайта тикланади ва умид қилинадики, «Андижон» клубининг бу каби масъулиятсизлиги қайта такрорланмайди. ЎзПФЛ Маъруф Абдусаломовдан ўз ишига масъулият билан ёндошишни, шунингдек, клуб уставида қайд этилмаган вице-президент лавозими билан эмас, айнан уставда мавжуд лавозим билан хатларга имзо чекишни сўрайди.
ПФЛ баёноти
Биринчи хат
Иккинчи хат
Аввалроқ айрим манбалар томонидан «Андижон»—«Пахтакор» учрашуви ўтказилмаслиги, боиси андижонлик футболчиларнинг уч ойдан бери маош олмаётгани ва ҳатто ўтган йилдан қолиб кетган қарзлар ҳам борлиги ҳақида хабарлар тарқатилган. Шундан сўнг «Tribuna.uz» нашри «Андижон» футбол клуби тарқалиб кетиши мумкинлиги ҳақида хабар қилиб, клуб ходимларидан бирининг қуйидаги гапларини эълон қилди:
Клуб банкротлик эълон қиляпти. Бугун ўринбосарлар таркиби, эртага асосий жамоа «Пахтакор» билан ўйнаши керак эди. Жамоамиз ўтган тур ўйинидан кейин Тошкентда эди. Ўша ерда машиналарни чақириб, футболчиларни уйларига тарқатиб юбордик. Ўринбосарлар жамоаси ҳам ўтган тур ўйинига зўрға бориб келган эди. Йўлда ҳайдовчилар уларни бепул олиб кетишдан ташқари овқат пулларини ҳам ўзлари беришганди. Энди «Пахтакор» билан ўйнаш учун жамоанинг ўзи йўқ. Ҳозир ҳамма ҳайрон. Бу йил ҳисобидан GM томонидан айтарли пул берилмади. Бу йил ҳисобидан 2 миллиард сўмдан озгина ошиқроқ пул берилди, холос. Бироқ 8 ойга бунча пул ҳеч нарса бўлмайди-да!
Таъкидлаш жоиз, Мусобақалар ўтказиш регламентининг 8.7 бандига мувофиқ, U-21 жамоаси яна бир учрашувга узрли сабабсиз етиб кела олмаса, клубнинг асосий таркиби ҳам ЎзПФЛ Ижроқўми қарори асосида мусобақалардан четлаштирилиши мумкин.
«Андижон» 12-турдан кейин 6 очко билан мусобақа жадвалида 13-ўриндан жой олган. Тошкентликлар эса 31 очко билан 1-поғонада бормоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)