КХДР етакчиси Ким Чен Ин ўзининг комада ётгани тўғрисида тарқалган миш-мишлар фонида Корея Меҳнат партияси Марказий қўмитаси сиёсий бюросининг коронавирусга қарши курашга бағишланган йиғилишини ўтказди. Бу ҳақда Корея Марказий телеграф агентлигига таяниб, «Интерфакс» хабар берди.

Фото: Корея Марказий телеграф агентлиги

Йиғилишда «глобал соғлиқни сақлаш инқирози оқибатларини бартараф этиш» бўйича давлат сиёсати масалалари, шунингдек, республика чегараларида коронавируснинг олдини олиш бўйича мамлакат раҳбариятининг камчиликлари муҳокама қилинган.

Фото: Корея Марказий телеграф агентлиги

Бундант ташқари, учрашувда шу ҳафта Шимолий Корея қирғоқларига ёпирилиши кутилаётган тайфунга қарши туриш бўйича фавқулодда чоралар белгилаб олинган.

Аввалроқ Жанубий Корея собиқ президенти Ким Де Чжуннинг маслаҳатчиси Чан Сон Мин КХДР етакчиси бир неча ойдан бери комада эканлигини маълум қилганди. Жанубий Корея разведкаси маълумотларига кўра эса Ким Чен Ин ўз ваколатларининг бир қисмини синглиси Ким Ё Чжонга топширган.

Эслатиб ўтамиз, 2020 йилнинг апрель ойи охирида турли ОАВлар Ким Чен Иннинг юраги операция қилингани ва соғлиғи ёмонлашгани, ҳатто унинг вафот этгани ҳақида хабарлар берган. Бу хабарлар ортидан Шимолий Кореяда ҳукмрон Меҳнат партиясининг матбуот органи бўлган Rodong Sinmun газетаси оммага 20 кун кўринмаган Ким Чен Иннинг ўғит заводи очилишида тушган фотосуратларини эълон қилганди.