«Қора ният»даги Йилдиз — Эда Эже ҳақида нималарни биламиз?

Ўзбек телетомошабинларига «Қора ният» турк сериалидаги Йилдиз Йилмаз роли билан яхши таниш бўлган актриса Эда Эже ҳақида маълумотлар билан бўлишамиз.

Ёшлиги

Тўлиқ исми Эда Эже Узуналиоғлу бўлган турк актрисаси 1990 йил 20 июнда Истанбулда дунёга келган. Эда олий маълумотли оиланинг фарзанди. Унинг икки опаси бор, улардан бири Эдадан 9 ёш, иккинчиси эса 7 ёш катта. Опалари юрист ва журналистлик касбини танлаган. Бўлажак актриса болалигида балетга қатнаган, пианино чалишга қизиққан ва хорижий тилларни ўрганган.

Лекин театрга бўлган қизиқиши бошқача бўлган. Мактаб театрида роль ижро қилганини кўрган Тюмай Озокур унга «Ҳаёт фани» фильмида роль беришга қарор қилган. Онаси уни суратга олиш майдончасига етаклаб борганида Эже 13 ёшда бўлган. Лекин маълум вақтдан кейин онаси қизини бошқа суратга тушмаслигини маълум қилган. Шундан кейин у мактабни тамомлаб, Истанбулдаги Билги университетининг психология факультетига қабул қилинган.

American Hastanesi хусусий шифохонасида тажриба муддатини ўташ давомида Эже психология ва санъат ўртасида узвий боғлиқлик бор эканини тушуниб етади. Шундан кейин университетда санъат тарихи йўналишида ўқишини давом эттиради. Актриса инглиз ва немис тилларида бемалол гаплаша олади.

Карьераси

Гани Мужде кастингида иштирок этиб «Ёмон еттилик» сериалида роль ижро қилишга муваффақ бўлади ва шу билан актрисалик фаолиятини бошлайди. 2013 йилда Зейнеп Салдиран ва Буржу Бирижиклар билан «Мени шундай сев» сериалида суратга тушади. Шунингдек, шу йилнинг ўзида «Қизим учун» фильмида ҳам Еткин Дикинчи билан бирга роль ижро қилади. 2015 йилда «Оилавий Аҳвол: аралаш», 2016 йилда «Қайнисингил» фильмида иштирок этади.

Аммо Талат Булут, Шеввал Сем, Киван Касабали ва бошқалар билан бирга суратга тушган «Қора ният» фильмидаги роли унга машҳурлик олиб келган. Ушбу фильмнинг суратга олиш жараёнида кўнгилсиз воқеа юз берган ва бу актёрлар муносабатига таъсир қилмай қолмаган. Актёр Талат Булат либосчи қизга тегажоғлик қилганликда айбланган. Суд далиллар етарли бўлмагани сабаб актёрни айбсиз деб эълон қилишига қарамай Эда қизнинг ёнини олган ва ҳамкасбига қарши чиққан.

Шахсий ҳаёт

Турк сариқ матбуотининг ёзишига қараганда, Эда продюсер Нежати Акпинар билан муносабатда бўлган. Ўзидан 28 ёш катта инсон билан учрашиб юриши узоқ вақт ОАВ учун мавзу бўлган. Бугунги кунда эса актриса Бухрахан Тунсер билан муносабати яхши, деган миш-мишлар ҳам йўқ эмас.