Қуйидаги актёрлар фильмларда инсонлар кайфиятини кўтарадиган комик роль ижро қилган ва мухлислар ёдида шундай образда қолган. Шунга қарамай, ҳаётида ўзига яраша қийинчилик бўлган актёрларни драматик ижроларини томоша қилиб, уларнинг очилмаган қиррасини кашф қилиш мумкин.
Жона Хилл (36 ёш)
Тўладан келгани билан ажралиб турадиган актёр, асосан, комик ролларни ижро қилган. Жонанинг вазнидаги ортиқча килолар карьерасига халақит қилмаган, лекин саломатлиги билан боғлиқ жиддий муаммолар кузатилган. Шундан кейин актёр рационини ўзгартирган ва спорт билан шуғуллана бошлаган ва натижада 2017 йилда 30 килограмм «ташлаш»га муваффақ бўлган. Шундан кейин Жона драматик ролларни ижро қила бошлаган. «Ҳақиқий ҳикоя», «Ҳаммасини ўзгартирган инсон» фильмларидаги роли шулар жумласидан. Гаса Ван Сентанинг «Хавотир олма, у узоққа кетмайди» картинасида Хилл одамларга спиртли ичимликка қарамликдан қутулишга ёрдам берадиган кучли қаҳрамонни жонлантирган.
Жек Блэк (50 ёш)
«Рок мактаби»да қувноқ роль ўйнаган, «Кунг-фу панда» мультфильмида пандага овоз берган актёр исми қувноқликнинг синонимига ўхшайди. «Хавотир олма, у узоққа кетмайди» фильмида актёр комик ижросидан буткул узоқлашмаган. Лекин фильм сўнгидаги саҳналардан бирида комик қаҳрамоннинг драматик томонини кашф қилиш мумкин бўлади. 2016 йилда интернетда актёр ўлими ҳақида тарқалган ёлғон ахборот эса унинг мухлислари учун ҳақиқий шок бўлган. Актёр ҳазилкаш бўлишига қарамай, ўзининг ўлими ҳақидаги маълумот уни қанчалик ёмон аҳволга солганини тасаввур қилиш қийин.
Робин Уильямс (1951-2014)
Карьерасини стендапдан бошлаган комик актёр «Попай» фильмидаги ролидан кейин машҳурликка эришган. Аммо «Орзулар қаерга етаклар» ва «Ақлли Уилл Хантинг» драмалари актёрнинг жиддий ролларни ҳам қойиллатишини исботлаган. У 80 йилларда иллюстратор Жон Каллаханнинг мемуарларини сотиб олган ва унда роль ижро қилишни истаган, лекин лойиҳа тақдим қилинмаган. Робин 2014 йилда ҳаётдан кўз юмган. У бир неча йиллар давомида депрессияда бўлган ва бу алькоголга қарамликни келтириб чиқарган. Кўп ичиш оқибати эса Паркинсон касаллигига олиб келган.
Жим Керри (58 ёш)
«Ниқоб», «Аҳмоқ ва аҳмоқроқ», «Кабелчи», «Ёлғончи-ёлғончи» ва бошқа бир қанча фильмлардаги комик роллари билан яхши таниш бўлган Керри арсеналида тушкунликка тушган маъюс қаҳрамонлар ижроси ҳам бор. Қийинчиликда кечган болалик, ўқиш билан боғлиқ муаммолар, онасининг отаси ишсизлигидан асабий тушкунликка тушганини кўриб улғайган Керрига таниш ҳис-туйғу руҳий ҳолатни «Труман шоуси», «Ойдаги одам» фильмларидаги ижрода ҳис қилиш мумкин. «Фалокат келтирадиган рақам 23» психологик триллерида эса у китобдаги сюжетни ва ўз ҳаётидан ажрата олмайдиган ақлдан озган инсон ролини ўйнаган. 2015 йилда актёрнинг собиқ севгилиси Катриона Уайт ўз жонига қасд қилган ва унинг ёнидан Керри тахаллуси ёзилган таблеткалар ҳамда ўлимидан аввал актёр билан айрилгани ёзилган видео топилган. Қизнинг оила аъзолари унинг ўлимида Керрини айблаган, ушбу фожиадан актёр қизнинг уларидан кам тушкунликка тушмаган.
Оуэн Уилсон (51 ёш)
«Ота-она билан танишув», «Чақирилмаган меҳмон», «Музейдаги тун» фильмларида комик роль ижро қилган актёр «Мўъжиза» фильмида драматик қаҳрамонни гавдалантирган. Ушбу фильмда у юзида жиддий муаммо билан туғилган ва 10 йил ичида 27 марта операция қилинган боланинг отаси ролини ижро қилган.
Билл Мюррей (69 ёш)
«Арвоҳ овловчилар» комедиясидаги ижросидан кейин танилган актёр бугунги кунда режиссёр Уэс Андерсоннинг энг севимли актёрларидан бири. «Таржима қийинчиликлари» фильмидан хулоса чиқарилса, актёр машҳурликдан чарчаган инсон бўлиб кўриниши мумкин. Мазкур ижро актёрга «Олтин глобус» мукофотига эгалик қилиши ҳамда «Оскар»га номзоди қўйилишига сабабчи бўлган.
Алексей Смирнов
Леонид Гайдайнинг «И операцияси» фильмидаги комик роли билан яхши таниш бўлган актёр Леонид Биковнинг «Кексаларгина жангга киради» фильмида драматик маҳоратини намоён қилган. Ушбу фильмда Смирнов роль ижро қилмаган, унда яшаган. Актёрнинг фарзанди бўлмаган, лекин доим болали бўлишни орзу қилган. 7 йил давомида Смирнов Ваня исмли ногирон болакайни болалар уйидан асраб олишга уринган, лекин рухсат берилмаган. Спиртли ичимликларга ҳаддан ташқари қарам бўлиб қолган актёр 59 ёшида юрак хуружидан вафот этган.
Изоҳ (0)