Айрим актёрлар болалигиданоқ ўйнаган роллари билан томошабинлар хотирасида сақланиб қолади. Уларга машҳурлик борасида омад қанча тез кулган бўлса, ёши улғайганида у даражада мухлислар эътиборини қозона олмайди. Улар фақат бола образида мухлислар қалбидан жой олган ва бутун умрга шундай бўлиб қолади.
Линдси Лохан
Линдси Лохан 2 июль куни таваллуд айёмини нишонлайди. Болалигиданоқ фильмларда роль ижро этган Линдсининг режиссёрлар келажакда жуда таниқли актриса бўлишини умид қилган эди. Аммо бундай бўлмади, Лохан бу борада муваффақият қозонмади. 33 ёшли Линдси Лоханнинг ҳаётида бўлиб ўтган бахтли ва қайғули кунлари актрисанинг ёлғиз ўзига аён. Жамоат олдида ўзини жозибали тутган Лохан бир неча бор қамоқхонада ўтириб чиқди, гиёҳванд моддалар ва спиртли ичимликлардан доимо азият чекди.
У илк бора «Ота-оналар тузоғи» фильмида роль ижро этган. Ушбу оилавий комедияда Линдси бирданига иккита образда намоён бўлган. Ўзининг ва эгизак синглисининг ролини ижро этиш Линдсини жуда чарчатади. Фильм муваффақиятга эришгандан сўнг Линдсининг онаси қизига менежер бўлади ва қизидан қаттиқроқ ишлашини талаб этади. Балки, шундай босим Линдсини ҳам руҳий, ҳам жисмоний томондан зўриқишга олиб келгандир.
Маколей Калкин (Кэвин Маккалистер)
Айнан қишки таътил арафасида экранларда пайдо бўладиган тиниб-тинчимас сариқ болани танимайдиган одам бўлмаса керак. «Уйда ёлғиз» Рождество комедиясида Кэвин Маккалистер ролини ижро этган Маколей Калкин Гиннес рекордлари китобига киритилган ҳамда мамлакатдаги энг кўп ҳақ оладиган бола, деб топилган.
Афсуски, у 16 ёшида муваффақиятидан маст бўлиб, ота-онасини тарк этади ва юлдузлик ҳаётида яшай бошлайди. 2004 йил ноқонуний моддалар сақлагани учун қамоққа олинди. Бу давргача у бирорта фильмда суратга тушишни хоҳламади. Ҳаттоки у жамият ҳаётидан ҳам ғойиб бўлганди. Машҳурликка эришган болакай улғайгач, депрессия қуршовида қолиб кетди.
Мара Уилсон (Матильда)
Бир вақтлар бу ёқимтойгина қизалоқ энг машҳур актрисалардан бири бўлган. Мара Уилсон «Матильда» фильми орқали танилган. Ундан сўнг яна бир қанча фильмларда эпизодик ролларни ижро этди. Аммо кейинчалик экранларда кўринмай қўйди. Маранинг улғайганини ҳеч қайси режиссёр қабул қила олмади ва унга роль борасида таклиф тушмади. Мара 2000 йил санъатни тарк этгунига қадар ўзи ҳақида бир қанча миш-мишлар эшитди. Аммо булар Марани хафа қила олмади, у ўзини бошқа соҳада бўлиши кераклигини англаб етди.
Жейк Ллойд (Энакин Скайуокер)
Энакин Скайуокер «Юлдузлар жанги. Эпизод I: Яширин хавф:» фильмида чексиз машҳурликка эришган 10 яшар бола. Шунингдек, у нафақат машҳурликка, балки тузатиб бўлмас муаммоларга ҳам дуч келганди. У фильмда ролни ажойиб тарзда ижро этар, ўзини яхши тутар эди. Машҳурлик ва яна бошқа ҳодисалар туфайли у ўнлаб кўрсатувларга интервью бериш, тадбирларда иштирок этиш мажбуриятидан халос бўлди. Шунингдек, 2001 йил у актёрлик фаолиятини тугатаётганини ва режиссёрлик қилишини расман эълон қилди.
2015 йил июнь ойида бўлиб ўтган автомобиль ҳалокатидан сўнг унинг онаси ўғлини шизофрения бўлганини, агар у дори воситаларини қабул қабул қилишни тўхтаца, ўзини бошқара олмаслигини айтди. У бир неча ойлар давомида қамоқхонада бўлди, кейинчалик ташхислар уни руҳий касаллар шифохонасига бориш кераклигини исботлади. Шундан буён 30 ёшли Ллойд ҳақида ҳеч қандай маълумот йўқ.
Эдвард Ферлонг (Жон Коннор)
Эдвард Ферлонг 13 ёшга тўлганида уни «Терминатор 2» фильмидаги Жон Коннор ролига танлаб олишган. Вақт ўтиб, машҳурликнинг тарк этиши Эдварднинг ҳаётини бутунлай ўзгартириб юборди. У машҳур бўлиб уйғонди, барча нуфузли кечаларда унга илтифот кўрсатилди. Айнан шундай кечаларнинг бирида машҳур актёр тақиқланган моддаларни синаб кўради. Шундан сўнг актёрнинг ҳаётида кўп нарса изидан чиқди ва киноларда қайта кўринмади.
Изоҳ (0)