Япония ҳукумати Nissan ва Honda’ни бирлаштиришни режалаштирмоқда

2019 йилда Япония ҳукумати Nissan ва Honda компанияларига бирлашиш таклифини билдиргани маълум бўлди. Бу ҳақда Financial Times газетасига таяниб, Motor хабар берди.

Nissan ва Honda’ни бирлаштириб юбориш ғоясига Япония бош вазири Синдзо Абэнинг маслаҳатчилари муаллифлик қилган. Нашр маълумотларига кўра, мазкур таклифга бир қатор омиллар сабаб бўлган: биринчидан, Карлос Гон ҳибсга олинганидан сўнг, япон ҳукуматида Renault-Nissan альянси келажагига нисбатан шубҳа пайдо бўлган, иккинчидан, жаҳон автомобиль бозоридаги рақобат кескинлашган ва янги альянс япон автомобиль ишлаб чиқарувчиларининг позициясини мустаҳкамлашга хизмат қилиши мумкин. Ва ниҳоят, учинчидан, ушбу қадам Nissan ва Honda’га ҳайдовчисиз бошқариладиган машиналар ва электромобиллар соҳасида олиб борилаётган ишларни бирлаштириш ва шу орқали сарф-харажатларни камайтириш имконини берган бўларди.

Тахминларга кўра, янги япон альянси ҳозирда Suzuki, Subaru ва Mazda’га таъсир ўтказишга қодир Toyota’га рақобатчилик қилиши мумкин. Ўз навбатида Honda мустақил автомобиль ишлаб чиқарувчи бўлиб, катталиги бўйича мамлакатдаги учинчи ўринда туради: бренд йилига 4,8 миллион нусха машина сотади.

Шунга қарамай, Nissan ва Honda директорлар кенгаши ҳамон ушбу масалада бирор якуний қарорга келмаган. Бунга автомобиль брендларининг фарқи, бизнес-стратегиялар (Nissan электромобилларни ривожлантирмоқда, Honda эса — водород двигателларни), шунингдек, Nissan альянс ичида Renault ва Mitsubishi’ни ҳам ривожлантиришга диққатини қаратгани сабаб қилиб кўрсатилмоқда.