Тошкент вилоятининг Бўстонлиқ тумани ҳамда пойтахт аҳолисига қулайлик яратиш мақсадида Тошкент шаҳри «Машинасозлар» метро бекати—Бўстонлиқ «Юсуфхона қўрғони» йўналишида янги автобус қатнови йўлга қўйилди. Бу ҳақда Транспорт вазирлиги хабар қилган.
«Мазкур йўналишда қатновнинг ташкил этилиши билан дам олиш кунлари тоғ ёнбағрида мароқли ҳордиқ чиқариш истагида бўлган Тошкент аҳолиси учун Бўстонлиқ туманига қулай шароитда бориб келиш имконияти яратилди.
Автобус йўналишининг масофаси бир томонга сал кам 83 километрни ташкил этади. Автобуслар ушбу масофани 1 соат 35 дақиқада босиб ўтади. Ушбу йўналишга Тошкент вилояти Қибрай туманига қарашли «Тошкент вилояти шаҳарлараро йўловчи ташиш автосаройи» МЧЖ томонидан замонавий, барча қулайликларга эга бўлган Yutong автобусларида йўловчиларга хизмат кўрсатилади.
Ҳаракатланиш жадвалига мувофиқ, бир кунда 18 та қатнов амалга оширилади. Ҳар куни соат 06:00 да илк автобус «Машинасозлар» метро бекатидан йўналишга чиқади. Кун давомидаги охирги автобус «Юсуфхона қўрғони»дан соат 20:55 Тошкент шаҳри томон йўлга чиқади», — дейилади хабарда.
Ушбу йўналишда йўл ҳақи 10 000 (ўн минг) сўм этиб белгиланган.
Ўзбекистон Президенти Шавкат Мирзиёев 14 август куни Бўстонлиқ туманида туризм салоҳиятини кенгайтиришга доир лойиҳалар тақдимоти билан танишган ва шу куни туманда ташкил қилинадиган Билдирсой—Чимён—Нанай халқаро курорти ҳақидаги мулоҳазаларини баён этганди.
Шу куни давлат раҳбари томонидан ҳудудни тўлиқ туристик зона сифатида ривожлантириш ва режадаги лойиҳаларни муваффақиятли амалга ошириш мақсадида бош вазир ўринбосари — Ўзбекистон Республикаси Туризмни ривожлантириш давлат қўмитаси раиси Азиз Абдуҳакимовга параллел равишда янги тажриба тариқасида Бўстонлиқ туманига раҳбарлик вазифасини бажаришни юклаш хусусида таклиф билдирган.
Изоҳ (0)