Яна бир америкалик фуқаро давлат томонидан ўзига ажратилган ёрдам пулини бошқа мақсадларда сарфлаб юборди. Ходимларига 1,5 миллион доллар маош тўлаш ўрнига биснесмен Kia Stinger, яхта ва уй сотиб олган, деб хабар беради Motor.
Вашингтон штатида истиқомат қилувчи 41 ёшли Кеннет Гоган ҳукуматдан 1,5 миллион доллар миқдорида компенсация пулини олган. Тадбиркор ушбу пулларни коронавирус пандемияси вақтида қийин аҳволда қолган ўз ходимларига маош сифатида тўлаб бериши керак бўлган. Бироқ эркак пулларни бошқа мақсадда сарфлашга қарор қилган.
Қалбаки ҳужжатлар ва банк карталари ёрдамида Кеннет барча маблағни ўз номини расмийлаштириб, ходимларига бир сент ҳам тўламаган. Бизнесмен бир нечта компания номидан ариза бериб, барч пул маблағларини ўзлаштирган.
Фирибгар ўғирланган пулларнинг 46 минг долларига Kia Stinger харид қилган. Бундан ташқари, эркак 300 минг долларлик яхта ҳамда 1,13 миллион долларлик уй ҳам сотиб олган.
Бироқ у ҳукуматдан узоқ яшириниб юра олмади. Тез орада АҚШ Адлия вазирлиги бизнесменни электрон маблағлардан фойдаланиб, банк фирибгарлигини амалга ошириш ва «пул ювиш»да айблаган. Спорткар ва яхта мусодара қилинган. Кўчмас мулкни ҳам худди шу каби қисмат кутмоқда.
Июль охирларида Майамида истиқомат қилувчи Дэвид Т.Хайнс исмли тадбиркор давлат томонидан коронавирус эпидемияси шароитида тадбиркорларга кўрсатилаётган ёрдам дастури доирасида ажратилган пуллар эвазига 2020 йилда ишлаб чиқарилган Lamborghini Huracan спорткарини сотиб олгани, эндиликда у 30 йилга қамалиши ва катта миқдорда жаримага тортилиши мумкинлиги тўғрисида хабар берилганди.
Изоҳ (0)