Ўзбекистонда болалар орасида грипп ва пневмонияга қарши режадан ташқари вакцинацияларни амалга ошириш йўллари кўриб чиқилмоқда. Бу ҳақда Коронавирусга қарши курашиш штаби аъзоси, Соғлиқни сақлаш вазирлиги Оналик ва репродуктив саломатликни муҳофаза қилиш бошқармаси бошлиғи Барно Абдусаматова «Шифобахшуз» каналида маълум қилди.
Барно Абдусаматованинг маълум қилишича, болаларни вакцинация қилиш куз—қиш мавсумида вирусли касалликларнинг олдини олиш ва касалликларнинг кириб келиш даражасини пасайтиришга қаратилган.
«Болалар орасида грипп ва пневмонияга қарши режадан ташқари вакцинацияларни амалга ошириш йўлларини Соғлиқни сақлаш вазирлиги кўриб чиқмоқда. Бу ишлар куз ойларида бажариш режалаштирилган», – деди мутахассис.
Соғлиқни сақлаш вазирлиги тарқатган маълумотларга кўра, ўз вақтида вакциналашни ўтказмаган ота-оналар болаларнинг касалликлар олдида заиф бўлишига сабабчи бўлиши мумкин. Миллий эмлаш календарига 13 та касалликларга қарши ишлаб чиқилган 10 та вакциналар киритилган. Ўзбекистонда вакциналар ишлаб чиқарилмайди. Барча вакциналар импорт қилинади.
Изоҳ (0)