Қозоғистон клиник синовларнинг барча босқичлари якунланмагунча COVID-19 вакциналарини сотиб олмайди. Tengrinews’нинг хабар беришича, бу ҳақда мамлакат Соғлиқни сақлаш вазирлигининг расмий вакили Багдат Кожаҳметов маълум қилди.
«Коронавирус инфекциясига қарши вакциналар барча тегишли халқаро сертификатлардан ўтганидан кейингина сотиб олинади. Мутахассисларимизнинг айтишича, энг яхши лаборатория натижалари учинчи босқичда бўлади. Яна тўртинчи босқич ҳам бор, аммо унгача ҳали ҳеч ким етиб бормаган. Фақат шундан кейингина халқаро сертификатлаш жараёни бўлиб ўтади, у қайси мамлакатда бўлади ва қайси лаборатория синовидан ўтиши номаълум. Ҳамма кутмоқда», — деган у.
11 август куни Россия президенти Владимир Путин ушбу вакцина рўйхатга олинганини маълум қилди. Унинг айтишича, вакцина хавфсиз ва ҳатто қизларидан бири ушбу вакцина билан эмланган.
Шу билан бирга ғарб давлатлари экспертлари Россиянинг коронавирусга қарши вакцинани одамларда кенг кўламли синовлардан ўтказмасдан олдин рўйхатдан ўтказиш қарорини танқид қилди. Лондон университет коллежи қошидаги Генетика институти мутахассиси Франсуа Баллунинг фикрича, шошилинч рўйхатга олиш «ўйламай қилинган ва аҳмоқона қарор».
Шунга қарамай, Қозоғистон президенти Қосим-Жўмарт Тўқаев вакцина рўйхатдан ўтказилгани билан Путинни табриклади (телеграмма юборди). Президент август ойининг иккинчи ярмида ҳукумат делегацияси Россия вакциналарини сотиб олишни муҳокама қилиш учун Москвага боришини таъкидлаган.
Изоҳ (0)