Қашқадарё вилоятининг Яккабоғ туманида яшовчи блогер Мақсуд Музаффаровнинг уйи тинтув қилинди. Фуқаронинг бармоғини синдиришда айбланаётган блогер мазкур ишни тергов қилаётган ва унинг хонадонида тинтув ўтказган ИИБнинг холислигига ишонмаяпти. Бу ҳақда «Дарё» мухбири билан суҳбатлашган Мақсуд Музаффаровнинг айтишича, фаолияти танқид қилиб келинган ИИБ блогерни шу тарзда жазолашга ҳаракат қилмоқда.
Маълум бўлишича, карантин пайтида йўналишли Damas’лар йўлкира нархини ошириб юборгач, блогерлар Мақсуд Музаффаров, Камил Фахриддиновлар ташаббус билан чиқиб, бепул такси лойиҳасини амалга оширган.
«2020 йил 17 июнь куни туман тиббиёт бирлашмасидан бозоргача бўлган масофага одам ташиётган Damas’лар 1500 сўм нарх белгилаб олишган экан. Ваҳоланки, ўртадаги масофа нари борса икки километрни ташкил этади. Мен эса уч нафар танишим билан жами тўртта машинада аҳолига бепул хизмат кўрсатиш учун ‘стоянка’га бордик. Damas’чилар бизнинг ниятимизни билгач, аввалига бизга қасдма-қасд йўлкира нархини 500 сўм қилиб белгилашди. Ва ўша куни тушгача шу нархда одам ташиди. 500 сўмга хизмат кўрсатмайдиган Damas’лар ўрнига, биз бепул хизмат кўрсатдик ва бозоргача одам ташидик. Аммо Damas’чилар тушдан сўнг тўполон кўтариб, бизни калтаклашди», — дейди блогер Мақсуд Музаффаров.
Табиийки аҳолига беминнат хизмат кўрсатишни мақсад қилган блогерлар иши ушбу йўналишдаги Damas’лар фаолиятини тартибга солувчи уюшма масъулларига ҳам маъқул келмаган.
«Уюшма масъули ёнимизга келиб мақсадимизни сўради. Аҳоли Damas’лар нархи ошиб кетганидан шикоят қилаётганини, шу боис такси қилиш ниятимиз борлигини айтдик. У бизнинг ишимиз ноқонунийлигини айтди. Мен ҳам уюшма масъулига унинг ҳам иши ноқонунийлигини, карантин пайтида Damas’лар фаолияти тўхтатилганини айтдим. Ва қонуний томонлама ҳар иккимиз ҳам хато қилаётганимизни билдирдим», — дейди блогер.
Воқеалар ривожига кўра, Damas’чилар блогерларга бўш кетмаслик учун илгари 1500 сўмдан қатнаган манзилига, 500 сўм нарх белгилаган. Блогерлар эса нарх тушганидан хурсанд бўлиб, ортга қайтган. Аммо тушдан сўнг яна ўша ерга боришганида Damas ҳайдовчилари билан келишмовчилик юзага келган.
«Менга такси қиласанми, деб савол беришди. Ҳа, қиламан, дедим. Шунда уриб кетишди. Устимдан ИИБга шикоят қилиб, қўлимни синдирди, деб ёзиб берган фуқаро Ҳусниддин Раҳматов айнан сингани айтилган қўли билан ёқамдан ушлаб, ургани акс этган видео бор. Видеони ИИБ терговчисига бердик. Аммо терговчи видеога эътибор ҳам қаратмаяпти», — дейди блогер.
Айтилишича, блогерлар ва Damas’чилар ўртасидаги муштлашувдан сўнг тўрт нафар фуқаро блогерлар устидан ИИБга шикоят қилган. Ҳусниддин Раҳматов эса Мақсуд Музаффаров қўлини синдирганини билдирган. 17 июнь куни тушдан сўнг эса блогерлар ҳам уларни калтаклаган фуқаролар устидан ИИБга шикоят қилган.
«Ҳусниддин Раҳматов 17 июнь куни соат 15:00 да Мақсуд қўлимни синдирди, деб ИИБга шикоят қилган. Ваҳоланки, ўша куни соат 16:00 да ўртамизда муштлашув бўлган. Мендаги видеода муштлашув айнан соат 16:00 да бўлиб ўтгани кўринган. ИИБ терговчисига шу видеони кўрсатиб, соатига эътибор қилишини, қолаверса, фуқаронинг сингани айтилган қўли билан мени ураётган жойини кўрсатдик. Аммо терговчи бунга умуман эътибор қаратмаяпти. Сабаби ИИБ вазиятдан фойдаланиб, менга дарс бериб қўймоқчи бўляпти. Шунинг учун ҳам ИИБнинг холислигига ишонмайман», — дейди Мақсуд Музаффаров.
Мақсуд Музаффаров мазкур можародан сўнг Бош прокуратура, Ички ишлар вазирлиги ва ДХХга видеомурожаат йўллаб, ҳаёти хавф остида эканлигини, фуқаро сифатида ҳимояга олинишини сўраган.
«Айнан шу мурожаатимдан сўнг ИИБ уйимизда тинтув ўтказди. Тинтувдан бир ой олдин менга мазкур воқеага тааллуқли видеоларни тақдим этишимни сўраб хат беришганди. Аммо хатда қачон тақдим қилишим кераклиги, агар тақдим этмасам, қандай оқибатларга олиб келиши ҳақида ёзишмаганди. Қолаверса, ИИБ мазкур сўровдан сўнг анча пайт жим бўлиб кетишди. Мен эса ҳуқуқий томонлама тўғри иш қилибман, деган хулосадан бу сўровни эсдан чиқардим. Бироқ бир ойдан сўнг тинтувга келишди. Тинтувдан олдин телефон ва видео ёзиб олинган ‘флешка’ни ҳам бердим. Шунга қарамасдан барибир тинтув ўтказишди», — дейди блогер Музаффаров.
«Ўша куни айнан ўша соатда бизнинг уйимизга ҳам етти-саккиз нафар ИИБ ходими бориб, прокурор санкцияси борлигини, тинтув ўтказишларини айтди. Мен ва уйдагилар бунга эътироз билдирдик. Шунга қарамасдан карантин қоидаларига зид равишда уйимизда тинтув ўтказишди», — дейди блогер Камил Фахриддинов.
Маълум бўлишича, блогерларнинг уйида тинтув ўтказилишига Шаҳрисабз шаҳар прокурори санкция берган.
ИИБнинг Яккабоғдаги ушбу ҳаракати ва блогерларнинг бундан норозилиги ҳақида Олий Мажлис Сенати раиси Танзила Норбоева ҳам Сенатнинг олтинчи ялпи мажлисида алоҳида тўхталиб ўтди ва ҳолатни танқид қилди. Шундан сўнг воқеага Қашқадарё вилоят прокуратураси муносабат билдирди.
«Яккабоғ туман ички ишлар бўлими ҳузуридаги Тергов бўлими томонидан фуқаро Раҳматов Ҳусниддиннинг тан-жароҳати олганлиги ҳолати юзасидан Жиноят кодексининг 105-моддаси 1-қисми (қасддан баданга ўртача оғир шикаст етказиш) билан қўзғатилган жиноят иши юзасидан тергов ҳаракатлари олиб борилмоқда. Жабрланувчи тан-жароҳатини фуқаро М.Музаффаров етказганлигини, ўша куни содир бўлган жанжални М.Музаффаров ва унинг шериклари телефон аппарати ҳамда автомашинасида ўрнатилган видеони қайд этиш ускунасида тасвирга олинганлигини билдирган.
Шунга кўра, тергов органи томонидан М.Музаффаровга телефон аппарати ва автомашинасида ўрнатилган видеони қайд қилиш ускунасини кўздан кечириш учун ихтиёрий тақдим этиши сўралганда М.Музаффаров тергов органи талабини рад этган.Шундан сўнг жабрланувчи Ҳ.Раҳматовнинг кўрсатувларини текшириб, ҳақиқий ҳолатга ойдинлик киритиш мақсадида жанжалда иштирок этган олти нафар шахс, шу жумладан, ўзи ҳамда М.Музаффаровнинг уйида ҳам тинтув тергов ҳаракатлари ўтказилган. Тинтув ўтказиш учун санкция беришда қонунчилик талаби бузилмаган. Жиноят иши тергови устидан Яккабоғ тумани ва вилоят прокуратураси томонидан назорат ўрнатилган. Тергов якунига кўра, қонуний қарор қабул қилиниши таъминланади», — дейилади вилоят прокуратураси берган ахборотда.
Маълум қилинишича, блогерлар Мақсуд Музаффаров ҳамда Камил Фахриддиновлар ишини Яккабоғ туман ИИБ терговчиси Дилшод Поёнов олиб бормоқда.
«Терговчи Ҳусниддин Раҳматовнинг қўли, тўғрироғи, бармоғи сингани билан боғлиқ вазиятда унинг бармоғи қай ҳолатда синганига, яъни мен синдирган бўлсам, қайириб синдирдимми ёки мени ураётган пайтида синдими ёки бирор-бир қаттиқ жисмга урилиши оқибатида синдими? Айнан шу ҳолатларга эътибор бермаяпти. Мен эса шу саволлар очиқ қолаётгани учун терговчининг холислигига ишонмаяпман», — дейди М.Музаффаров.
«Дарё» мухбири блогерни шубҳалантираётган вазият ҳамда ИИБ терговчисининг изоҳини олиш мақсадида Яккабоғ туман ИИБда бўлди.
Журналистни бир соат куттирган терговчи саволларни эшитганидан сўнг жавоб беролмаслигини, барча маълумотлар ИИБ ахборот хизматидан олиниши мумкинлигини маълум қилди. Вилоят ИИБ ахборот хизмати раҳбари Ирода Расулова эса терговчига журналист саволларига жавоб бериши лозимлигини билдирди. Шунга қарамасдан терговчи саволларга жавоб бермади.
Ирода Расулованинг маълумот беришича, Мақсуд Музаффаров терговчининг холислигига ишонмаётган бўлса, унда шикоят қилиши мумкин, шунда ИИБ терговчини алмаштиради ёки терговни бошқа туман олиб боради.
Мазкур воқеага муносабат билдирган Олий Мажлис депутати Фарҳод Зайниев блогер Мақсуд Музаффаров мунтазам равишда ЙПХ фаолиятини ёритиб бораётганини ва тизимда йўл қўйилаётган камчиликларни ёзишда давом этиши тизимда фаолият юритаётганларда блогерга нисбатан салбий қарашни шакллантирганини таъкидлайди ва мазкур ҳолатда мутасадди идора раҳбарлари эътибор қаратишини, қонун устуворлиги таъминланиши лозимлигини билдиради.
Қашқадарёлик блогерлар эса ушбу вазиятда ИИБ билганини қилаётганини, блогерларни ҳимоя қилиши лозим бўлган ташкилот эса сукут сақлаётганини танқид қилади.
«Қора халқнинг кунига яраш учун бепул такси лойиҳасини ташкиллаштирган блогерни маҳаллий таксичилар калтаклагани етмагандек, блогер мени уриб қўлимни синдирди деб устидан ариза ҳам берган. Видеотасвирда блогер калтаклангани акс этган бўлса ҳам блогернинг уйини тинтув қилишибди. Вилоятдаги матбуот хизматлари жим, АОКА жим, Масс-медиа жим, ҳақиқат жим, адолат жим», — деб ёзади блогер Отабек Артиқов.
Отабек Артиқов вилоят фаолларини воқеага Президент эътибор қаратмагунча муаммога ечим изламасликда айблайди.
«Қани вилоят фаоллари ё айнан бу муаммони ҳам юртбошимиз айтганларидан кейин ечамизми, ўзи Президент бирор муаммони айтмагунча ҳеч ким ечим изламайдиган аҳволдамиз-ку», — дейди у.
Блогерлар Зафарбек Солижонов ҳамда Умид Каримовлар эса вилоятда блогерларга нисбатан ноҳақликлар бўлаётган пайтда АОКАнинг вилоят бошқармасидан садо чиқмаётганини танқид қилди.
«Энг қизиғи, вилоятдаги АОКА вакили Усмон Нусуров мум тишлаган. У ҳам бир қўрқоқлардандир-да, нима қилсин. Энг қизиғи, Сенат раиси Танзила Норбоева Яккабоғдаги шу каби ҳолатларга диққат қаратган. Энди Қашқадарё вилоят ҳокимлиги ва органдагилардан нажот кутамиз, шекилли. Ҳолатга тўлиқ изоҳ берилиши керак», — деб ёзади Зафарбек Солижонов.
«АОКАнинг вилоят бошқармаси ‘каттаси’ Усмон Нусуров бундай масалаларда доим жим туради. Саида Мирзиёева эътибор қаратган Қаршидаги харобага айланган журналистлар уйининг катталар эътиборига тушмаслигига ҳам Нусуров айбдор. Блогерни ҳимоя қилолмаса, журналистларга шароит яратиб беролмаса, бу раҳбарга ойлик тўлашнинг нима кераги бор? Агентликни вазифаси фақат тадбир ўтказишдан иборат эмас-ку! Улар қачонгача ўзини ёлғон ҳисоботлар билан алдаб юрмоқчи. Мен блогер сифатида АОКАнинг вилоят бошқармаси бошлиғи Усмон Нусуров бу лавозимда ишлашини хоҳламайман. Асаджон Хўжаевдан вилоятимизга блогер, журналистларни ҳимоя қилишдан қочмайдиган ва яккабоғлик блогерларнинг ишларини назоратга олиб, қонуний манфаатларини ҳимоя қиладиган холис одамни раҳбарлик лавозимига тайинланишини сўрайман», — дейди Умид Каримов.
Сенат танқиди ва блогерлар эътирозидан сўнг Усмон Нусуров бошчилигидаги жамоа блогер Яккабоғдаги воқеага эътибор қаратганини билдирди.
«Қашқадарёлик блогерлар М.Музаффаров ҳамда К.Фахриддинов билан боғлиқ вазият бошқарма мутасаддиларининг қатъий назоратига олинган. Айни пайтда тегишли идоралар билан ҳамкорликда вазиятга ойдинлик киритиш ва қонуний баҳо бериш бўйича иш олиб борилмоқда», — дейилади бошқарманинг Telegram’даги расмий каналида.
«Дарё» мухбири билан суҳбатлашган Усмон Нусуров 2020 йил 10 август куни Яккабоғ туманида бўлиб, блогерлар муаммосига ечим топилишида кўмаклашмоқчилигини билдирди.
«Дарё» Яккабоғдаги воқеалар ривожини кузатишда давом этади.
Изоҳ (0)