Физика-математика фанлари доктори, ядро физикаси соҳасида мутахассис олим, Ўзбекистон Фанлар академияси Ядро физикаси институти Назарий ядро физикаси лабораторияси мудири Зокиржон Каноков 2020 йил 7 август куни 64 ёшида ҳаётдан кўз юмди. Бу ҳақда Ядро физикаси институти хабар берди.
Қайд этилишича, Зокиржон Каноков 1956 йил 25 январида Тошкент вилоятининг Бўстонлиқ туманида таваллуд топган. 1973 йил Тошкент давлат университетининг Физика факультетига ўқишга кирган.
Илмий фаолиятини 1978 йилдан Ўзбекистон Фанлар академияси Физика-техника институтида бошлаган. 1983—2012 йиллар давомида Ўзбекистон Миллий университети Физика факультетида илмий ходим ва педагог, 1986—1987 йилларда Москва давлат университетида стажор ўқитувчи, 2012—2017 йилларда Миллий университети Физика факультети «Назарий ва ядро физикаси» кафедраси мудири, 2018 йилдан ҳозиргача ЎзФА Ядро физикаси институти Назарий ядро физикаси лабораториясининг мудири лавозимида самарали фаолият кўрсатиб келаётган эди.
Зокиржон Каноков илмий фаолияти давомида Очиқ квант системалар ва наносистемаларининг ҳаракат динамикасини, оғир ионлар тўқнашувида вазмин ядроларнинг қўшилиши ва бўлиниши жараёнларини ўрганишга катта эътибор берган. Бу тадқиқотлар Россиянинг Дубна шаҳрида жойлашган Бирлашган ядро тадқиқотлари институти олимлари эътиборини тортди ва узоқ йиллар давомида ҳамкорликда қилинган изланишларнинг асоси бўлган.
Таъкидланишича, ҳамкорликда қурилган янги назарий усуллар дунё миқёсида тан олинган. Зокиржон Каноков 80 дан ортиқ илмий нашрлар, 60 дан ортиқ мақолалар чоп этган. Ўзининг илмий-педогогик фаолияти давомида кўплаб ўқув қўлланмалар муаллифидир ва Тошкент давлат университети Физика факультетида талабаларга ядро физикаси ва элементар зарралар физикаси, ядро моделлари фанларидан чуқур сабоқ берган.
Зокиржон Каноков жуда кўплаб ёш изланувчиларнинг катта илмий марказларда фаолият юритишига ва мамлакат ёшларининг илмий салоҳиятининг ошишига катта ҳисса қўшгани таъкидланган.
Хабарда 64 ёшли Зокиржон Каноковнинг ўлими сабабига ойдинлик киритилмаган.
Аввалроқ Монополияга қарши курашиш қўмитасининг 40 ёшли бошқарма бошлиғи, Маданият вазирлигининг 32 ёшли ходими, Музработ тумани ҳокимлигининг 35 ёшли бўлим бошлиғи ўринбосари вафот этгани ҳақида хабар берилган эди. Шунингдек, Маданият вазирлигининг ходими ва Музработ тумани ҳокимлигининг бўлим бошлиғи ўринбосари коронавирусга чалингани тасдиқланган.
Ўзбекистонда 9 август соат 23:30 ҳолатига кўра, коронавирус инфекцияси қайд этилганлар сони 30 609 нафарга етган. Айни пайтда Ўзбекистонда 22 042 нафар коронавирус инфекциясига чалинган фуқаро (72 фоиз) соғайган. Соғлиқни сақлаш вазирлиги тақдим этиб келаётган статистика бўйича мамлакатда эпидемия бошланганидан буён 194 киши вафот этган.
Изоҳ (0)