Ўзбекистонлик яккакурашчи Маҳмуд Муродов навбатдаги жангини 2020 йилнинг 17 октябрида ўтказади. Бу ҳақда спортчи ўзининг Instagram саҳифаси орқали маълум қилди.
«Дўстлар, кейинги жангим 17 октябрда Кшиштоф Йоткога қарши бўлиб ўтади. Худо хоҳласа, тез орада сизларни яна бир ғалаба билан хурсанд қиламан! Қўллаб-қувватлаганингиз учун барчангизга катта раҳмат» — деб ёзиб қолдирган Маҳмуд Муродов.
Аввалроқ Маҳмуднинг UFC промоушени билан навбатдаги жанг учун шартнома имзолагани тўғрисида хабар берилганди.
Маълумот учун, Кшиштоф Йотко MMA’даги фаолияти давомида 26 та жанг ўтказиб, шуларнинг 22 тасида ғалаба қозонган, 4 тасида эса имкониятни бой бериб қўйган.
Эслатиб ўтамиз, Маҳмуд Муродов UFC’да ҳозиргача иккита жанг ўтказган. У UFC’даги дебют жангида италиялик Алессио ди Кирикони (12-4, 9 КО) очколар ҳисобига кўра, иккинчи жангида Тревор Смитни (15-10, 10 КО) учинчи раундда нокаут эвазига мағлубиятга учратган.
Муродовнинг учинчи жанги аслида UFC 249 доирасида 19 апрель куни Карл Роберсонга қарши кечиши лозим эди. Бироқ ушбу жанг коронавирус пандемияси сабаб бекор қилинганди.
Маҳмуд Муродовнинг UFC’даги жангларини томоша қилинг (видео)
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)