Коронавирусга чалинган ва қатор ҳамроҳ касалликлари бўлган яна бир бемор аёл вафот этгани ҳақида Соғлиқни сақлаш вазирлиги хабар берди.
Тошкент шаҳри Яккасарой туманида яшаган 59 ёшли М.М. исмли аёлда 15 июль куни COVID-19 тасдиқланган ва Эпидемиология, микробиология ва юқумли касалликлар илмий-текшириш институти клиникасига ётқизилган.
Унга COVID-19 инфекциясининг ўта оғир кечиши, икки томонлама пневмония ташхиси қўйилган. Хасталик ўткир респиратор дистресс синдром, ўткир нафас ва юрак қон-томир етишмовчилиги, полиорган етишмовчилик, ўткир буйрак етишмовчилиги каби асоратлар билан кечган.
Таъкидлаш жоизки, беморда 2014 йил буйрак трансплантацияси амалиёти бажарилган бўлиб, 2017 йилда кўчириб ўтказилган буйрак ўз вазифасини бажаришдан тўхтаган ва у доимий гемодиализ олиб юрган.
Шунингдек, беморда қандли диабет, юрак ишемик касаллиги, стабил зўриқиш стенокардияси, гипертония, артериал гипертензия, сурункали буйрак етишмовчилиги, семизликнинг 3-даражаси каби ҳамроҳ касалликлар ҳам бўлган.
Бемор ўткир нафас, юрак қон-томир ҳамда полиорган етишмовчилигидан вафот этган. Аёлнинг қайси куни вафот этганига ССВ хабарида аниқлик киритилмаган.
Бироз олдин ССВ айнан шу шифохона (Эпидемиология, микробиология ва юқумли касалликлар илмий-текшириш институти клиникаси)да 67 ёшли аёл коронавирус асоратларидан вафот этганини хабар қилганди.
Соғлиқни сақлаш вазирлиги ҳисобига кўра, 59 ёшли М.М. коронавируснинг 145-қурбонига айланди. «Дарё» ҳисоби бўйича коронавирус асоратлари оқибатида вафот этганлар сони 152 нафарни ташкил этмоқда.
