Рембрандт автопортрети аукционда рекорд ўрнатди: у 18,7 млн долларга сотилди

Рембрандт томонидан чизилган автопортрет Лондондаги аукционда 14,5 миллион фунтга (18,7 миллион доллар) сотилди. Бу нидерландиялик рассом томонидан чизилган автопортретларнинг рекорд нархи ҳисобланади, деб хабар беради Sotheby’s кимошди савдолари уйи сайтида.

Полотно дастлаб 12-16 миллион фунтга баҳоланган. Уни қўлга киритиш учун олтита коллексионер «курашган». Картинанинг аукцион якунидаги баҳоси 2003 йилда ўрнатилган нархдан икки баробар қимматроқни ташкил этган.

Рембрандт ушбу автопортретни 1632 йилда 26 ёшида чизган. У умри давомида 80 га яқин автопортретлар чизган бўлса-да, аукционда сотилган варианти Рембрандт ўзини расмий кийимда тасвирлаган иккита ноёб полотнодан бири ҳисобланади.

Картина жаҳон санъатининг беш юз йиллик тарихини ўз ичига олган «Рембрандтдан Рихтергача» савдолари доирасида сотилган. Савдолар орқали 193 миллион доллар даромад кўрилган бўлиб, бешта лот 10 миллион долларлик маррадан ошиб кетган.

Аукцион кечасининг топ-лотига испаниялик рассом Жоан Миронинг абстракционизм услубида яратилган «Қизил шляпадаги аёл» картинаси айланган. Дастлабки нархи 20-30 миллион доллар бўлган лот 30,5 миллион долларга сотилган.