Бухоро шаҳар ҳокимлиги қошидаги Уй-жойларни ҳисобга олиш ва нотурар жойлардан фойдаланиш давлат корхонаси бошлиғи ўринбосари оилавий ётоқхонадан уй расмийлаштириб бериш эвазига 4 минг доллар олаётган вақтида қўлга олинди. Бу ҳақда «Дарё»га Бош прокуратура ҳузуридаги иқтисодий жиноятларга қарши курашиш департаменти вилоят бошқармаси ахборот хизмати хабар берди.
Маълум бўлишича, Бухоро шаҳрида истиқомат қилувчи фуқаро Д.Ҳ. шаҳар ҳокимлиги қошидаги Уй-жойларни ҳисобга олиш ва нотурар жойлардан фойдаланиш давлат корхонасига мурожаат қилиб, боқувчисини йўқотганлигини, оилавий шароити оғирлигини, уйга муҳтожлигини маълум қилиб, уй ажратишни сўраган.
Мурожаатчини қабул қилган масъул, шаҳар ҳокимлиги қошидаги уй-жойларни ҳисобга олиш ва нотурар жойлардан фойдаланиш давлат корхонаси бошлиғи ўринбосари Р.С. фуқарога оилавий ётоқхонада уй йўқлигини, аммо қизининг номидаги уйини унинг номига ўтказиб беришини айтиб, эвазига 4 минг доллар сўраган.
Фуқаро бу ҳақда 2020 йил 24 июль куни ДХХ вилоят бошқармасига шикоят қилган. Фуқаро аризасига асосан, 28 июль куни ДХХ вилоят бошқармаси ҳамда бош прокуратура ҳузуридаги иқтисодий жиноятларга қарши курашиш департаменти ходимлари томонидан ўтказилган тезкор тадбирда мансабдор 4 минг долларни пора тариқасида олаётган вақтида жиноят устида қўлга олинган.
Қўшимча қилинишича, мансабдор Р.С. 2007 йилда ҳам пора билан қўлга олинган. Ўшанда у Жиноят ишлари бўйича Бухоро шаҳар суди томонидан айбдор деб топилиб, 14 йилга озодликдан маҳрум қилинган, 3 йилга муайян ҳуқуқи чекланган. Шунингдек, Жиноят ишлари бўйича Бухоро шаҳар судининг 2015 йил 17 июлдаги қарорига кўра, ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш билан шуғуллангани учун 3 йил муддатга ахлоқ тузатиш жазосини ўтаган. Бироқ у қўлланилган жазо чораларидан хулоса чиқармаган.
Ҳозирда ушбу ҳолат юзасидан терговга қадар суриштирув ишлари олиб борилмоқда.
Изоҳ (0)