Ўзбекистонда ҳозирга қадар 2,5 мингдан ортиқ ҳомиладор аёл карантин назоратига олинган, улардан 234 нафарида коронавирус инфекцияси тасдиқланган. Бу ҳақда Соғлиқни сақлаш вазирлиги бошқармаси бошлиғи Барно Абдусамадова маълум қилди.
Вазирлик масъулининг хабар беришича, касаллик тасдиқланган ҳомиладор аёлларнинг 120 нафари соғайиб, уйига рухсат берилган. Касалланганлар орасида 2,9 фоиз ҳолатда ўлим қайд этилган.
Барно Абдусамадованинг сўзларига кўра, касаллик оқибатида вафот этган ҳомиладор аёлларда семизлик, юрак қон-томир етишмовчилиги, нафар тизими касалликлари, буйрак касалликлари каби ҳамроҳ касалликлар кузатилган.
Вазирлик вакили томонидан берилган статистик маълумотдан келиб чиқилса, коронавирусга чалинган 7 нафар ҳомиладор аёл касаллик қурбони бўлган.
Соғлиқни сақлаш вазирлиги Тошкент шаҳрида 28 июль куни коронавирусга чалинган 40 ёшли ва 34 ёшли икки ҳомиладор аёлнинг, 27 июль куни 35 ёшли ва 32 ёшли ҳомиладор аёлларнинг вафоти ҳақида хабар берганди. 26 июль куни коронавирусга чалинган 34 ёшли яна бир тошкентлик ҳомиладор аёл вафот этган. 24 июль куни Қашқадарёда 35 ёшли ҳомиладор аёл коронавирус қурбони бўлгани ҳақида хабар берилган.
Вазирлик касаллик оқибатида вафот этган яна бир аёл ҳақида хабар бермаган. Расман тасдиқланмаган маълумотларга кўра, вафот этгани ҳақида 9 июль куни хабар берилган 28 ёшли жиззахлик аёл ҳам ҳомиладор бўлган.
Аввалроқ Ўзбекистонда 8 июлга қадар 208 нафар ҳомиладор аёлда коронавирус аниқлангани ҳақида хабар берилганди.
Изоҳ (0)