2020 йилнинг дастлабки олти ойи ҳисоб-китобларига кўра, Ўзбекистонда аҳоли жон бошига ҳисобланган ЯИМ миқдори 7,49 миллион сўмни (766 АҚШ доллари) ташкил этди. Бу ҳақда Давлат статистика қўмитаси маълумотларида келтирилган.
Аҳоли жон бошига ЯИМ миқдори, жорий нархлардаги ЯИМ умумий ҳажмини мамлакатнинг маълум бир даврдаги ўртача аҳолиси сонига бўлиш йўли билан аниқланади. Ўзбекистон доимий аҳолисининг ўртача сони 2020 йилнинг январь—июнида 34 миллион кишини ташкил қилган.
2019 йилнинг январь—июнь ойлари билан таққослаганда аҳоли жон бошига ЯИМ миқдори 1,8 фоизга камайган. 2018 ва 2019 йилларнинг январь—июнь ойларида ушбу кўрсаткич мос равишда 4,2 ва 4,1 фоиз ўсишни ташкил этган эди.
Аҳоли жон бошига ЯИМ, асосан, иқтисодий фаоллик ва турмуш даражасини акс эттиради. Қисман боғлиқ бўлган бошқа мезонлар уй хўжаликларининг моддий фаровонлигини, хусусан, уларнинг реал истеъмоли даражасини яхшироқ акс эттиради.
Жаҳон банкининг маълумотларига кўра, 2019 йили Ўзбекистонда жон бошига ЯИМ миқдори 1,7 минг долларни ташкил этган. Энг юқори кўрсаткич Макао (129 минг доллар), Люксембург (121 минг доллар), Сингапур (101 минг доллар)да қайд этилган.
Изоҳ (0)