Австралияда 2019—2020 йилларда кузатилган ўрмон ёнғинлари оқибатида уч миллиардга яқин жониворлар нобуд бўлган ёки жароҳат олган. Бу ҳақда ёввойи табиатни асраш бутунжаҳон жамғармаси буюртмасига кўра қилинган Phys.org’нинг тадқиқот ҳисоботида маълум қилинган.
Ҳисобот муаллифлари асосий ўрмон ёнғинлари кузатилган Жанубий Уэльс ва Викториядан ташқари Австралиянинг қолган ҳудудини ҳам тўлиқ ўрганиб чиққан. 2020 йил бошида ушбу икки штатнинг ўзида миллиардга яқин жониворлар қурбон бўлгани хабар қилинганди.
Тадқиқотчилар берган маълумотларга кўра, Австралияда ёнғинлар оқибатида 143 миллионта сутемизувчилар синфига мансуб ҳайвонлар, 2,5 миллиард судралиб юрувчилар, 180 миллион қушлар ва 51 миллион қурбақа талафот кўрган.
Ёнғинлар оқибатида айнан қанча ҳайвон нобуд бўлгани ҳақида аниқ маълумот берилмаган. Бунда жароҳатланганлар ва олов туфайли бутунлай қирилиб кетган ҳайвонлар синфи ҳам инобатга олинган.
Ҳисобот Сидней, Жанубий Уэльс, Ньюкасл, Чарльз Стерт университетлари ҳамда BirdLife Australia табиатни асраш гуруҳи томонидан тайёрланган, дейилади Phys.org хабарида.
Тадқиқотлар натижалари яна қайта ишланиб, 2020 йил август ойи охирида якуний ҳисобот эълон қилинади. Муаллифларнинг айтишича, якуний ҳисоботда уч миллиард жониворларнинг талафот кўргани ва нобуд бўлгани сезиларли даражада ўзгармаслиги мумкин.
2019 йил сентябрда 2020 йил март ойигача Австралияда ўрмон ёнғинлари содир бўлган ва уларнинг оқибатида 34 нафар одам ҳалок бўлганди. Reuters агентлигининг қайд этишича, ортда қолган ёнғин мавсуми Австралия тарихида ҳали кузатилмаган энг ёмон даврлардан бири бўлган.
Мавзуга доир:
Изоҳ (0)