Коронавирусга қарши курашиш штаби аъзоси, профессор Ҳабибулло Оқилов кам сонли ва коронавирусни даволашга мослаштирилган шифохоналарга коронавирусга чалинган беморларни ётқизиш тўхтатилишини маълум қилди.
«Вазият талаб қилганда мавжуд бўлган клиникаларнинг аксарияти коронавирусли беморларни даволашга мослаштирилди. Лекин бугунга келиб Зангиота туманидаги ихтисослашган инфекцион клиниканинг 4 та кластери ишга тушган. Ҳафта якунига келиб бешинчи кластер ҳам ишга тушади. «Ўзэкспомарказ» павильонларида етарли даражада койка-ўринлар захираси яратилгани туфайли кам сонли ва мослаштирилган клиникаларга коронавирусли беморларни ётқизиш тўхтатилмоқда. Ҳамма беморлар даволаниб бўлгач, бу клиникалар керакли дезинфекцион жараёнлардан сўнг ўз фаолиятига қайтарилади», — дейди Оқилов.
Эслатиб ўтамиз, аввалроқ Оқилов койка-ўринлар етмаётгани сабаб бошқа профилдаги клиникаларга беморларни ётқизишга мажбур бўлинаётганини, Президент Шавкат Мирзиёев 20 июль куни Тошкент шаҳри ва пойтахт вилоятида пандемия билан боғлиқ ҳолат ҳамда уни барқарорлаштириш бўйича чора-тадбирлар доирасидаги видеоселектор йиғилишида деярли барча ихтисослаштирилган тиббиёт муассасалари тўлдириб ташланганини айтган эди. Ўша йиғилишда сурункали касалликларни даволашга ихтисослашган шифохоналардаги коронавирусга чалинган беморларни хусусий клиникаларга кўчириш орқали сурункали хасталиги бор беморларга малакали тиббий хизмат кўрсатилишини қайта тиклаш чораларини кўриш топшириғи берилган.
Шунингдек, 8 июль куни Ҳабибулла Оқилов коронавирус инфекцияси белгисиз ўтаётган беморларнинг уй ва меҳмонхонада даволанишига рухсат берилган бўлса-да, Ўзбекистондаги стационарларда койка-ўринлар қолмаганини маълум қилганди. Бироқ 9 июль куни брифингда Оқилов пандемиянинг дастлабки кунларидан ҳукумат ўз вазифасини бажариб келаётгани, койка-ўринлар, дори воситалари захираси мавжудлигини билдирган. Президент Шавкат Мирзиёев 14 июль куни бўлиб ўтган видеоселектор йиғилишида мамлакатдаги эпидемиологик вазиятга яна бир бор алоҳида тўхталиб, мамлакатда коронавирусга қарши кураш учун барча захира ва имкониятлар мавжудлигини маълум қилганди.
Мавзуга доир:
Изоҳ (0)