Тошкент шаҳар Шайхонтоҳур туманидаги «Ёшлик» спорт мажмуаси коронавирус ташхиси қўйилган беморларни даволаш учун махсус марказга айлантирилди. Бу ҳақда Шайхонтоҳур тумани ҳокимлиги маълум қилди.

Фото: Шайхонтоҳур тумани ҳокимлиги

Хабар берилишича, ушбу марказ беморлар учун 520 нафар койка-ўринга эга бўлиб, барча зарур тиббий жиҳоз ва ускуналар билан таъминланган. Тиббиёт ходимларининг яшаши ва иш фаолиятларини олиб боришлари учун ётоқхона ва барча шароитлар мавжуд.

Фото: Шайхонтоҳур тумани ҳокимлиги

Иш 15 кунлик навбатчилик тартибида ташкил қилинади ҳамда ходимларга қуйидаги миқдорларда иш ҳақи тўланади:

  • Шифокорларга 15 миллион сўм;
  • Ҳамшираларга 10 миллион сўм;
  • Кичик тиббиёт ходимларига 5 миллион сўм.

Иш вақти 12 соатдан иборат бўлиб, 8 соат иш, 4 соат дам олиш вақтини ташкил этади.

Шунингдек, тиббиёт ходимлари тиббий ҳимоя воситалари билан таъминланади ва овқатланиш ҳам иш берувчи ҳисобидан бўлиб, маошлар ҳар куни тўлаб борилади. Туман ҳокимлигининг «Дарё»га маълум қилишича, иш ҳақи тўлови давлат бюджети ҳисобидан амалга оширилмайди.

Фото: Шайхонтоҳур тумани ҳокимлиги

Мазкур тақсимлаш марказида ишлашни хоҳловчилар қуйидаги телефон рақами орқали боғланиши мумкин: +998712496381.

Бунга қадар Юнусобод туманидаги «Ўзэкспомарказ» кўргазмалар мажмуасининг павильонларида коронавирусга гумон қилинган ва касалланган беморларни тақсимлаш маркази ташкил қилиниб, у ерга ҳам тиббиёт ходимлари ишга қабул қилинган ва марказ ўз фаолиятини бошлаганди.

Бундан ташқари, Сергели туманидаги болалар ва ўсмирлар спорт мактаби ҳудудида коронавирусга гумон қилинганларга ташхис қўйиш, заруратга кўра даволаш учун шароит яратилган.

Шу билан бирга, Тошкентда коронавирусга гумон қилинганлар ва касалланганларга ёрдам кўрсатадиган ва тун-у кун ишлайдиган 10 та махсус клиника ташкил қилинди.