Футбол бўйича Англия Премьер Лигасининг 2019/20 йилги мавсуми ўз ниҳоясига етди.
Сўнгги тур ўйинларида бир қатор очиқ турган масалалар ҳал бўлди.
«Манчестер Юнайтед» сафарда тўғридан-тўғри рақобатчиси «Лестер»ни таслим этди (2:0) ва мусобақани 66 очко билан 3-ўринда якунлади. Параллел ўйинда «Челси» «Вулверҳэмптон»ни енгиб (2:0), очколарини 66 тага етказди ва 4-ўринни банд этди.
Шу тариқа Оле-Гуннар Сульшер ва Фрэнк Лэмпард жамоалари Чемпионлар Лигасининг гуруҳ босқичига йўлланма олди. Аввалроқ «Ливерпуль» ва «Манчестер Сити» ушбу масалани ҳал қилиб қўйганди.
«Лестер» эса 62 очко билан 5-ўринга тушиб кетди. «Кўклар»га мағлуб бўлган «Вулверҳэмптон» (59 очко) эса 7-поғонада қолиб кетди. «Кристал Пэлас» билан дуранг ўйнаган (1:1) «Тоттенҳэм» (59) тўплар нисбати бўйича «бўрилар»дан яхшироқ натижа қайд этиб, 6-ўринга кўтарилди.
«Лестер» ва «Тоттенҳэм» Европа Лигаси йўлланмасига эга чиқди. Агар Лига Кубоги финалида «Арсенал» «Челси»га ютқазиб қўядиган бўлса, 7-ўриндаги «Вулверҳэмптон» Европа Лигасининг 3-йўлланмасига эга бўлади.
Шунингдек, мусобақанинг сўнгги турида Чемпионшипга равона бўладиган жамоалар номи ҳам маълум бўлди.
«Уотфорд» сафарда «Арсенал»га имкониятни бой берди (2:3) ва 34 очко билан 19-ўринда қолиб кетди. «Борнмут» «Эвертон»дан устун келиб очколарини 34 тага етказди. Бироқ «Астон Вилла» Лондонда «Вест Ҳэм» билан дуранг ўйнади ва очколарини 35 тага етказиб рақобатчиларидан ўзиб кетди.
Шу тариқа «Норвич» ортидан «Борнмут» ва «Уотфорд» ҳам АПЛни тарк этадиган бўлди.
Сўнгги турнинг марказий учрашувлари видеошарҳи билан танишинг (видео)
Мусобақа жадвалининг якуний кўриниши билан танишинг:
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)