«Ўзэкспомарказ»да коронавирусга чалинганларга ташхис қўйишга мўлжалланган тақсимлаш маркази иш бошлади

Тошкентда COVID-19 касаллигига гумон қилинганларга аниқ ташхис қўйиш ва зарур биринчи ёрдамни кўрсатишга хизмат қилувчи тақсимлаш маркази иш бошлади. Бу ҳақда пойтахт ҳокимлиги матбуот хизмати хабар берди.

23 июль куни Тошкент шаҳри ҳокими Жаҳонгир Ортиқхўжаев «Ўзэкспомарказ»даги тақсимлаш марказига бориб, бу ердаги шароитлар ва мазкур масканнинг беморларни қабул қилишга қанчалик тайёрлигини кўздан кечирган.

«Марказ билан танишиш жараёнида бу ерга келувчиларнинг хавфсизлигини таъминлаш, уларни тақсимлаш ва жойлаштириш учун яратилган шароитларга эътибор қаратди.

Таъкидлаш жоиз, COVID-19 касаллигига гумон қилинганларга аниқ ташхис қўйиш ва зарур биринчи ёрдамни кўрсатиш мақсадида ташкил этилаётган мазкур марказ беморларни қабул қилишга деярли тайёр.

Бу ерда вирус борлигига гумонланган шахслар вақтинча сақланиб, уларга биринчи тез ёрдам кўрсатилади ва ташхис қўйилганидан кейин саломатлигининг ҳолатига кўра, шаҳримиздаги даволаш-профилактика муассасаларига йўналтирилади», дейилади хабарда.

Зарурат юзага келганда бу ердан шифохона сифатида фойдаланиш учун ҳам керакли шароитлар яратилган, бунинг учун марказ талаб этилган тиббиёт жиҳозлари ва ускуналари билан таъминланган.

Марказда 250 нафар тиббиёт соҳаси мутахассислари фаолият юритиши режалаштирилган. Бу ерга шаҳарнинг турли ҳудудларидан COVID-19’га гумонланганлар олиб келинади. 

«Марказда инфекционист, вирусолог ва бошқа қатор тор мутахассислар жамланган ҳамда тест ва таҳлилларни ўтказиш учун зарур шароит яратилган. Беморлар учун шифохоналардаги каби шароитлар яратилган, зарур барча тиббиёт жиҳозлари ва ускуналари таъминоти етарли даражада йўлга қўйилган.

Бу ерга олиб келинган фуқаролар тўлиқ таҳлилдан ўтказилганидан сўнг касаллик даражаси ва саломатлигининг ҳолатига кўра, шифохоналарга йўналтирилади. Хасталик енгил кечаётган ва уй шароитида даволанишни маъқул деб билганлар эса уйида ўз-ўзини изоляция қилган ҳолда даволанишга юборилади.

Ушбу тақсимлаш марказининг ишга туширилиши COVID-19’ни ташхислаш ва ушбу вирусни юқтирганларни тиббиёт муассасаларига тақсимлаш ҳамда самарали даволашда муҳим вазифани бажаради», — дея таъкидланади матбуот хизмати хабарида.

Маълумот учун, «Ўзэкспомарказ»даги 500 ўринга мўлжалланган ушбу марказ коронавирусга чалингани гумон қилинган беморларга аниқ ташхис қўйиш ва касаллик даражасини аниқлаш, шунингдек, беморларга биринчи ёрдам кўрсатиш ва уларни клиникаларга тақсимлашга мўлжалланган. Агар зарурат туғилса, «Ўзэкспомарказ»нинг бошқа павильонлари ҳам коронавирусга чалинган беморларни даволашга мўлжалланган зонага айлантирилади.

Бу Тошкент шаҳар ҳокими Жаҳонгир Ортиқхўжаевнинг ташаббуси бўлиб, вазият жуда оғирлашганида Б режаси бўлиши учун амалга оширилмоқда. Марказни ташкил этиш ва таъминлаш харажатлари бюджет маблағлари ҳисобидан қопланмайди.