Сурхондарё вилояти ҳокимлиги ижтимоий тармоқларда ҳамда норасмий ахборот саҳифаларида вилояти ҳокими Тўра Боболовнинг вафот этганлиги тўғрисида тарқалган хабарларни рад этди.
«Воҳадошларимиздан айрим фуқаролар томонидан коронавирус ваҳимаси фонида тарқатилаётган бундай миш-мишлар, ёлғон ахборотларга ишонмасликларингизни сўраймиз», — дейилади хабарда.
Шунингдек, Сурхондарё вилояти ҳокимлиги матбуот хизмати ижтимоий тармоқлардаги гуруҳ администраторлари ҳамда шахсий аккаунт эгаларидан аҳоли орасида турли миш-мишлар пайдо бўлишига олиб келадиган бу мазмундаги ёлғон маълумотларни тарқатиш қонун олдида жавобгарликни келтириб чиқаришини эслатиб ўтган.
Бироқ кўп ўтмай ҳокимлик матбуот хизмати Тўра Боболов тўғрисида чиқарган хабарини ўчириб ташлаб, ўрнига янги хабар чиқарган. Унда вилоят ҳокимининг аҳволи яхши эканлиги, яқин кунларда иш фаолиятини давом эттириши қўшимча қилинган.
«24 июль куни соат 9:00 ҳолатига кўра, Сурхондарё вилояти ҳокими Тўра Боболовнинг ҳолати яхши. Даволаш тактикаси Жаҳон соғлиқни сақлаш ташкилоти томонидан ишлаб чиқилган стандартлар асосида олиб борилмоқда. Сурхондарё вилояти ҳокими касалликдан тўлиқ тузалиб, яқин кунларда иш фаолиятини давом эттиради», — дейилади ҳокимлик матбуот хизмати хабарида.
Эслатиб ўтамиз, Соғлиқни сақлаш вазирлиги 18 июль куни Сурхондарё вилояти ҳокими Тўра Боболов коронавирусга чалингани, Тошкент шаҳрида касалликдан даволанаётгани, аҳволи барқарор эканини маълум қилганди.
Изоҳ (0)