Олмалиқ шаҳар Аҳоли бандлигига кўмаклашиш маркази томонидан кунлик ишга чиқиб, даромад топаётган фуқароларнинг (мардикорлар) бандлигини таъминлаш бўйича бир қатор тадбирлар олиб борилди, деб хабар бермоқда Тошкент вилояти ҳокимлигининг ахборот хизмати.

Хабарга кўра, мардикор бозордаги 121 нафар фуқаронинг ҳар бири билан суҳбат ўтказилиб, уларнинг оилавий шароити ўрганилган. Суҳбат натижасида жами 121 нафар фуқародан 45 нафарининг доимий яшаш манзили Пискент туманида, 44 нафар фуқаронинг доимий яшаш манзили Оҳангарон туманида, 21 нафар фуқаронинг доимий яшаш манзили Олмалиқ шаҳрида эканлиги аниқланган. 11 нафар фуқаронинг доимий яшаш манзили бошқа туманларда жойлашгани ойдинлашган.

Ушбу фуқароларга марказ томонидан Techno continental МЧЖ, «Тиа жаҳон» МЧЖ, Тошкент шаҳридаги Artel корхонаси, «Нуртекс» МЧЖ ва ҳақ тўланадиган жамоат ишлари таклиф этилган.

Ҳокимлик ахборот хизматининг қайд этишича, фуқаролар таклиф этилган иш ўринларининг ойлик маоши камлиги, ушбу корхоналар томонидан бериладиган ойлик маошни кунлик ишда ишлаб, бир ҳафта ичида топиши мумкинлиги важидан рад жавобини берган.

Доимий яшаш манзили Олмалиқ шаҳрида бўлган 8 нафар фуқаро ҳақ тўланадиган жамоат ишларида ишлаш истагини билдириб, 2020 йил 1 август санасидан жамоат ишларига қатнашишга розилик билдирган.

2020 йил 6 июнда Халқаро пресс-клубнинг Фарғона вилоятига бағишланган сессиясида бандлик ва меҳнат муносабатлари вазири Нозим Ҳусанов Ўзбекистондаги ишсизлик даражаси ҳақида берилган саволга жавоб қайтарган ва ишсизлар сони қарийб 2 миллионга яқинлашганини айтганди.

2 июлда Ўзбекистонда 2020 йилнинг Иккинчи чораги якунларига кўра, ишсизлик даражаси 15 фоизгача кўтарилгани хабар қилинди. Бир кун ўтгач, Халқаро меҳнат ташкилоти (ХМТ)нинг Глобал саммити давомида Европа ва Ўрта Осиёда коронавирус пандемиясининг меҳнат бозорларига таъсирига қарши курашиш йўллари ва келажакдаги истиқболларини муҳокама қилинган ва унда иштирок этган Бандлик ва меҳнат муносабатлари вазири Нозим Ҳусанов Ўзбекистонда ижтимоий аҳволи ва турмуш шароити оғирлашган оилаларнинг бандлигини таъминлаш орқали уларга даромад манбайи яратишнинг вақтинчалик тартиби жорий этилгани, вақтинча бандлик бўйича жамоат ишлари фонди маблағлари ҳисобидан 230 мингга яқин ишсиз фуқаролар иш билан таъминланганини билдирганди.