Футбол бўйича Ўзбекистон Coca-Cola Суперлигасида иштирок этувчи «Бухоро» клуби футболчилари коронавирусга чалинди.
«Бухоро» клуб мабуот хизматининг хабарига кўра, 20 июль куни жамоанинг 8 нафар футболчисида коронавирус инфекцияси аниқланган. Шу боис «Бухоро»нинг Суперлига 10-туридан ўрин олган «Қизилқум»га қарши ўйини қолдирилиши мумкин. Учрашув 23 июль куни бўлиб ўтиши режалаштирилганди.
Эслатиб ўтамиз, аввалроқ «Пахтакор»нинг беш нафар, «Сурхон»нинг икки ва «Бунёдкор»нинг бир нафар ўйинчиси коронавирусга чалингани тўғрисида хабар берилганди. Шунингдек, Про-Лигада қатнашадиган Самарқанднинг «Динамо» клубининг уч нафар футболчисида коронавирус инфекцияси борлиги гумон қилиниб, 15 июль куни «Хоразм»га қарши ўтказилиши керак бўлган беллашув ҳам бекор қилинганди.
Аксарият футбол мутахассислари томонидан Суперлига баҳслари тўхтатилиши тахмин қилинмоқда. Айни дамда Профессионал футбол лигаси (ПФЛ) ва клублар ўртасида Суперлига баҳсларини давом эттириш ёки тўхтатиш борасида онлайн видеконференция кетаётгани ҳақида маълумотлар бор.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)