Инновацион ривожланиш вазири Иброҳим Абдураҳмонов ишлатилган ниқобларни кўчага ташламасликка чақирди. Бу ҳақда у вазирлик сайти орқали маълум қилган.
«Жамоат жойларда, кўчаларда тартибсиз ташлаб кетилган ёки ишлатилган ҳимоя ниқоблар билан тўла ахлат қутиларига кўзингиз тушгандир. Коронавирус инфекциясининг симптомларсиз, яъни аломатларсиз ўтадиган тури ҳам борлиги ҳақида шифокорларимиз муттасил бонг урмоқда. Шу билан бирга, катта эҳтимоллик билан вирусли томчилар қуриб, ҳаво орқали кўчиб юриши ва тарқалиши мумкинлиги тўғрисида ҳам хавотирлар пайдо бўляпти», — дейди Абдураҳмонов.
Вазир ҳафсаласизлик билан улоқтирилган ўша ҳимоя ниқоблари қанчадан қанча кишиларга хавф туғдирадиган инфекция манбаси бўлиши мумкинлигини таъкидлаган.
«Балки жамоат жойларига ишлатилган ниқоблар учун махсус дезинфекцияловчи контейнерлар қўйилишини ташкил қилиш керакдир, лекин нима бўлганида ҳам, минглаб юртдошларимиз шундай ҳолатларга эътибор беришлари, тозаликка, жамоат жойларида ва оиламизда турмушнинг гигиеник талабларига ва тартибларга қатъиян риоя қилишлари керак бўлади. Ҳар биримиз ишлатилган ниқобларга бефарқ бўлмаслигимиз ва уларни иложи борича дезинфекциялаб кейин ахлат қутиларига ташлашга ҳаракат қилишимиз касалликни енгишимизда катта ёрдам берар эди», — дея қайд этади вазир.
Шу билан бирга, Иброҳим Абдураҳмонов юзага келган вазиятни ўнглашнинг энг мақбул ва хавфсиз чораси – инфекция кенг тарқалмаслиги учун карантин тадбирларини кучайтириш эканлигини таъкидлаган.
Эслатиб ўтамиз, апрель ойида Экология ва атроф-муҳитни муҳофаза қилиш давлат қўмитаси Тошкентда тиббиёт чиқиндилари — ниқоб, қўлқоп ва бошқа коронавирусдан ҳимоя воситаларини йўқ қилиш учун махсус қутилар ўрнатилаётгани тўғрисида хабар берганди.
Изоҳ (0)