«Лидс Юнайтед» клуби Англия Премьер Лигаси йўлланмасига эга чиқди. Англиянинг уч карра чемпиони 16 йил деганда АПЛга қайтди.
Марсело Бьелса қўл остидаги жамоа 44 ўйинда 87 очко тўплади ва Чемпионшип мусобақа жадвалида биринчи ўринда бормоқда. «Вест Бромвич»нинг (82) мағлубиятидан кейин «Лидс» камида иккинчи ўринни нақд қилиб қўйди ва олий дивизионга тўғридан-тўғри йўлланмани қўлга киритди.
1990 йиллар ўрталаридан 2000 йиллар бошларига қадар «Лидс» мунтазам Еврокубокларда иштирок этиб келарди. Жамоа УЕФА Кубоги ва Чемпионлар Лигасида ярим финалларга қадар етиб борган. Молиявий муаммолар сабаб жамоа 2003/04 йилги мавсумда қуйи лигага равона бўлди. 2006/07 йилги мавсумда «Лидс» Биринчи Лигага тушиб кетди ва Чемпионшипга қайтиш учун уч йил сарфлади.
«Лидс Юнайтед» клубига 1919 йилда асос солинган. Жамоа Англиянинг уч карра чемпиони ҳисобланади (1968/69, 1973/74, 1991/92). Шунингдек, жамоа Англия Кубоги (1972), мамлакат Лига Кубоги (1968) ва Суперкубогини (1969, 1992) қўлга киритган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)