Шота Арвеладзе: ОКМКга қарши ўйинда 2 очко йўқотдик

«Пахтакор» футбол клуби бош мураббийи Шота Арвеладзе Coca-Cola Суперлига 9-тури доирасида ОКМКга қарши кечган ўйиндан (2:2) сўнг ўз фикрлари билан ўртоқлашди.

«Чемпионатнинг икки етакчи жамоаси тўқнаш келди. Қийин ўйин бўлди ва шундай бўлиши ҳам кутилганди. Имкониятларимизни ёдга оладиган бўлсак, бизда яхши вазиятлар юзага келди. Масалан, биринчи бўлимда бир неча имкониятдан фойдалана олмадик. Гол ўтказгач, кучимизни сал йўқотгандек бўлдик. Бу яхши ҳолат эмас. Биринчи бўлимдаги вазиятларда фақат гол уриш керак эди, холос. Рақиб қарши ҳужумда яхши ўйнади. Умуман олганда, икки очко йўқотдик, 0:2 дан сўнг қарасак, бир очко ишладик.

«Пахтакор»да кўп вазиятлар бўлди, лекин буни омад етишмагани билан боғламаган бўлардим. ОКМК ҳимоячилари яхши ўйнади, дарвозабон ҳам жуда яхши ҳаракат қилди ва кўп вазиятларда жамоасини қутқариб қолди. Ўзимиз ноаниқ зарбалар йўлладик.

«Пахтакор»ни сентябрда Чемпионлар Лигаси кутиб турибди. Ҳали буни ўйламаймиз, аввал ўша вақтга етиб олайлик. Орада июль ва август ойлари турибди. Футболда энг муҳими — кейинги ўйин.

Машариповнинг ўйини охирги йилларда ўзгарди. Ўтган йили 115 та гол урдик, уларнинг деярли ярмида Жалол узатмаларни амалга оширган. Бу унинг энг яхши ўйини бўлмади, ўзи ҳам ҳаракатларидан доим хулоса чиқариб боради. У футболчи сифатида анча улғайди. Бу йил ҳам деярли ҳар баҳсда гол уришимизга ёрдам бермоқда. Машарипов биз учун ҳам, ўзбек футболи учун ҳам катта ишлар қиляпти», — дейди грузиялик мутахассис.

«Пахтакор» мазкур ўйиндан сўнг 22 очко билан пешқадамликни сақлаб қолди. «Шерлар» кейинги турда 23 июль куни «Қўқон-1912» билан ўйнайди.

Мавзуга доир: Миржалол Қосимов «Пахтакор»дан 2 дақиқа ичида 2 та гол ўтказилгани ҳақида: «Қўшиб берилган дақиқаларда яна гол ўтказиб, мағлубиятга учрашимиз ҳам мумкин эди»