Тошкентдаги 16 та тиббиёт муассасасида жами 3580 та койка-ўрин коронавирус инфекциясини юқтириб олган беморлар учун ажратилган. Бу ҳақда Иқтисодиёт тадқиқотлар ва ислоҳотлар маркази (ИТИМ) раҳбари Обид Ҳакимов маълум қилди.
«16 та тиббиёт муассасасининг фаолияти коронавирус инфекциясини даволашга қайта мослаштирилди. Тошкент шаҳрида бир пайтнинг ўзида сиғими 4637 нафар киши бўлган 16 та тиббий муассаса фаолият юритмоқда. Шундан 3580 та жой коронавирус билан касалланган беморлар учун ажратилган», — дея маълум қилди у.
Ҳакимовнинг қўшимча қилишича, вилоятларда коронавирусга чалинган беморларни даволаш учун жами 3367 ўринлик муассасалар ажратилган. Қўшимча тарзда яна 22 та тиббиёт муассасасида 7130 та захира ётоқлар ажратилган, Зангиота туманида эса минг ўринли янги юқумли касалликлар шифохонаси фойдаланишга топширилди.
Маълумот учун: Ўзбекистонда 13 июль соат 10:00 ҳолатига кўра 5280 нафар бемор коронавирусдан даволанмоқда (уларнинг 4375 нафари Тошкент минтақасида рўйхатга олинган), ушбу беморларнинг неча нафарида касаллик аломатсиз (симптомсиз) кечаётгани маълум қилинмаган — 5 июлдан бошлаб касаллик аломатсиз (енгил) кечаётган беморларнинг уй шароитида даволанишига рухсат берилган эди. Қайд этиш жоиз, Соғлиқни сақлаш вазирлиги тизими мутахассисларининг фикрича, агар Ўзбекистонда кунига 1—1,5 мингта касалланиш ҳолати аниқлса, мамлакат соғлиқни сақлаш тизими қулайди.
Шу тариқа, Ҳакимовнинг алоҳида қайд этишича, Ўзбекистонда шифокорлар орасида коронавируснинг оммавий тарқалиши олди олинган. «Масалан, Нью-Йоркда ушбу муаммо баъзи клиникаларда тиббий ходимлар сонининг кескин тушиб кетишига олиб келган эди», — дея аниқлик киритди ИТИМ раҳбари.
Шунингдек, у Ўзбекистонда ўрта оғирликдаги беморларни даволаш учун ўртача 32,3 миллион сўм (3200 доллар), реанимацияда бўлган беморни даволаш учун эса 64,4 миллион сўм (6300 доллар) сарфланганини эслатиб ўтган.
«Масалан, Fair Health мустақил нотижорат ташкилоти экспертларининг ҳисоб-китобларига кўра, АҚШда коронавирусни даволаш суғурта қилинмаган бемор учун 73,3 минг долларга, суғурта полисига эга бемор учун 38 минг долларга тушади, шунингдек, коронавирусдан даволаниши 1 миллион долларни ташкил қилган беморлар ҳам бор экан», — дея қўшимча қилди Обид Ҳакимов.
Изоҳ (0)