Шотландияда жойлашган орол Лондондаги квартира нархида сотувга қўйилди, деб хабар беради Метро.

Фото: SWNS

Inchconnachan номли кимсасиз орол 500 минг фунт стерлингга сотилмоқда. Нашрнинг ёзишича, Лондондаги квартиралар нархи ҳам, тахминан, шу атрофда.

Оролнинг майдони 42 гектарга тенг бўлиб, Лох-Ломонд кўли ўртасида жойлашган. У ўсимликлар билан зич қопланган ва 20 йилдан буён ҳеч ким яшамайди.

Фото: SWNS

Фото: SWNS

Фото: SWNS

Унга фақат қайиқда етиб бориш мумкин. Оролда 1920 йилларда ёғочдан қурилган уй мавжуд. Уни бузиб ташлашга, шунингдек, бешта ётоқхонага эга янги уй қуришга рухсат берилган.

Бундан ташқари, оролнинг янги эгалари қайиқлар станцияси, пирс (кемаларни боғлаб қўйишга мўлжалланган махсус жой) ва қўшимча кулба қуришлари мумкин.

Эслатиб ўтамиз, 2017 йилда Шотландияда майдони 1,8 минг гектардан ортиқ бўлган орол 4,25 миллион фунт стерлингга сотувга қўйилган эди.