Қозоғистонда коронавирус пандемияси сабаб қўй ёғи ва саумалга (янги соғиб олинган бия сути) бўлган талаб ошиб кетди, деб хабар беради Tengrinews.

Кадр: Кокше ТВ

Ақмўла вилоятидаги кичик ва катта фермерларнинг эгалари маҳаллий аҳоли орасидаги бия сутига талаб ошганини таъкидлаган: бир кружка қимизни ичиш учун одамлар навбатга турмоқда.

«Бу жуда долзарб: мамлакатда коронавирус, одамлар қўрқяпти, иммунитетини кўтаришга бирор восита қидирмоқда. Саумал — табиий, шифобахш, витаминларга бой энг яхши дори воситаси», — дейди Мўғулистондан Қозоғистонга кўчиб келган Рахан Донайхан исмли фермер.

«Ҳозирда мижозлар жуда кўп. Худди бостириб келишаётгандек. Биз ҳатто қимиз тайёрлашга улгурмаяпмиз. Соат 08:00 дан бошлаб ҳар икки соатда бия соғаяпман. Сутни дарҳол ичиб қўйишяпти», — дейди фермернинг аёли Кенжегул Бадель.

«Бия сутида сигирникидан кўра 1,5 баробарга лактоза кўплиги илмий жиҳатдан исботланган. Немис олимлари томонидан ўтказилган тадқиқотлар у альбумин гуруҳига киришини кўрсатиб берди. Бошқача қилиб айтганда, у аллергиядан азият чекадиган инсонларга шифобахш таъсир қилади», — дейилади хабарда.

Вилоят Соғлиқни сақлаш бошқармаси бошлиғи Сулен Илясовнинг маълум қилишича, қимизда инсон организми учун муҳим бўлган витаминлар мавжуд. Саумал эса микроэлементлар таркиби бўйича она сутига яқин туради. Она сути эса — боланинг ўсиши, унинг организмини ташқи муҳитдан ҳимоя қилиши учун муҳим.

Сўнгги маълумотларга кўра, Қозоғистонда коронавирус билан касалланганлар сони 59 899 кишига етган. Ҳозирга қадар 34 190 киши соғайган, 375 киши вирус қурбонига айланган.