Qozog‘istonda koronavirus pandemiyasi sabab qo‘y yog‘i va saumalga (yangi sog‘ib olingan biya suti) bo‘lgan talab oshib ketdi, deb xabar beradi Tengrinews.
Aqmo‘la viloyatidagi kichik va katta fermerlarning egalari mahalliy aholi orasidagi biya sutiga talab oshganini ta’kidlagan: bir krujka qimizni ichish uchun odamlar navbatga turmoqda.
“Bu juda dolzarb: mamlakatda koronavirus, odamlar qo‘rqyapti, immunitetini ko‘tarishga biror vosita qidirmoqda. Saumal — tabiiy, shifobaxsh, vitaminlarga boy eng yaxshi dori vositasi”, — deydi Mo‘g‘ulistondan Qozog‘istonga ko‘chib kelgan Raxan Donayxan ismli fermer.
“Hozirda mijozlar juda ko‘p. Xuddi bostirib kelishayotgandek. Biz hatto qimiz tayyorlashga ulgurmayapmiz. Soat 08:00 dan boshlab har ikki soatda biya sog‘ayapman. Sutni darhol ichib qo‘yishyapti”, — deydi fermerning ayoli Kenjegul Badel.
“Biya sutida sigirnikidan ko‘ra 1,5 barobarga laktoza ko‘pligi ilmiy jihatdan isbotlangan. Nemis olimlari tomonidan o‘tkazilgan tadqiqotlar u albumin guruhiga kirishini ko‘rsatib berdi. Boshqacha qilib aytganda, u allergiyadan aziyat chekadigan insonlarga shifobaxsh ta’sir qiladi”, — deyiladi xabarda.
Viloyat Sog‘liqni saqlash boshqarmasi boshlig‘i Sulen Ilyasovning ma’lum qilishicha, qimizda inson organizmi uchun muhim bo‘lgan vitaminlar mavjud. Saumal esa mikroelementlar tarkibi bo‘yicha ona sutiga yaqin turadi. Ona suti esa — bolaning o‘sishi, uning organizmini tashqi muhitdan himoya qilishi uchun muhim.
So‘nggi ma’lumotlarga ko‘ra, Qozog‘istonda koronavirus bilan kasallanganlar soni 59 899 kishiga yetgan. Hozirga qadar 34 190 kishi sog‘aygan, 375 kishi virus qurboniga aylangan.
Izoh (0)